Temirjol vokzaldaryn rekonstrýktsııalaý: Nurlybek Nálibaev memlekettik organdarǵa tapsyrma berdi
ASTANA. KAZINFORM – QR Premer‑mınıstriniń birinshi orynbasary Nurlybek Nálibaevtyń tóraǵalyǵymen 124 temirjol vokzalyn jańǵyrtý jáne rekonstrýktsııalaý máseleleri boıynsha keńes ótti. Bul týraly Úkimettiń baspasóz qyzmeti habarlady.
Keńeske oblys ákimderi, Kólik, Ónerkásip jáne qurylys mınıstrlikteriniń jáne «Qazaqstan temir joly» UK» AQ basshylyǵy qatysty.
«Qazaqstan temir joly» UK» AQ basshylyǵynyń 124 temirjol vokzalyn jańǵyrtý jáne rekonstrýktsııalaý barysy týraly, Atyraý, Aqtóbe, Mańǵystaý, Abaı oblystary ákimderiniń baıandamalary tyńdaldy. Búgingi tańda 71 temirjol vokzaly paıdalanýǵa berildi. Qalǵan nysandar boıynsha jumystar bekitilgen kestege sáıkes jalǵasady.
Keńes barysynda nysandardy salý jáne jańǵyrtý merzimin saqtaýǵa, jumystyń sapaly oryndalýyna, memlekettik organdar men merdiger mekemeler arasyndaǵy úılestirýdi kúsheıtýge erekshe nazar aýdaryldy.
Keńes qorytyndysy boıynsha Nurlybek Nálibaev múddeli memlekettik organdarǵa temirjol obektilerin paıdalanýǵa berý merzimin saqtaýdy, qurylys-montajdaý jumystarynyń sapasyna baqylaýdy kúsheıtýdi tapsyrdy.
Aıta keteıik, elimizde jaz bastalǵaly beri qaıta jańǵyrtýdan ótken 70 temirjol vokzaly paıdalanýǵa berildi. Onyń 40-y shilde aıynda ashyldy.
