Temirjol torabynyń eki ýchaskesinde poıyz ben avtokólik soqtyǵysa jazdady

ASTANA. KAZINFORM —  Keshe Taraz jáne Shymkent JT bólimsheleri ýchaskelerinde lokomotıv brıgadalarynyń qyraǵylyǵy arqasynda temirjol ótkelderinde avtokóliktermen soqtyǵysýǵa jol berilmedi. Bul týraly «Qazaqstan temir joly» UK» AQ baspasóz qyzmeti málim etti.

— Birinshi jaǵdaı saǵat 06:26–da Taraz-Shý ýchaskesinde bolǵan. Aqsholaq — Úshbulaq aralyǵynyń temirjol ótkelinde elektrovoz mashınısi 55 km/saǵ jyldamdyqpen Shevrole Kobalt avto kóligine soqtyǵyspas úshin shuǵyl tejeý qoldanylǵan. Jedel árekettiń arqasynda soqtyǵysýǵa jol berilmedi. Poıyz 22 mınýtqa keshikken, — dep habarlady «Qazaqstan temir joly» UK» AQ-dan. 

Kompanııanyń habarlaýynsha, avtokólik basqarǵan júrgizýshige belgi berilse de, jol belgilisi anyq kórinip tursa da qaýip týǵyzyp, quqyq buzýshylyqqa jol bergen. Oqıǵa týraly aqparat Taraz qalasynyń jol polıtsııasyna jiberildi.

— Ekinshi oqıǵa 15:35–te Arys — Túlkibas ýchaskesinde tirkeldi. Shymkent — Qyzylsaı aralyǵynda 51 km/saǵ jyldamdyqpen kele jatqan № 2230 poıyz mashınısi jeńil avtomobıldiń jolǵa shyǵýyna baılanysty shuǵyl tejeýdi qoldandy. Soqtyǵysýdyn aldy alyndy, biraq júrgizýshi oqıǵa ornynan qashyp ketti, — delingen habarlamada.

Poıyz qozǵalysy 16 mınýtqa keshikken. Eki fakt boıynsha da tergeý júrgizilip jatyr. Temirjolshylar taǵy da júrgizýshilerdi joldardy kesip ótý erejelerin qatań saqtaýǵa shaqyrady, óıtkeni adam ómiri buzýshylyqtyń qaıtarymyna aınalýy múmkin. 

Buǵan deıin Astana – Ereımentaý baǵytynda poıyz ben úsh avtokólik soqtyǵysyp qala jazdaǵan edi.