Temirjol salasyndaǵy iri jobalar qashan paıdalanýǵa beriledi

ASTANA. KAZINFORM — Temirjol jelisiniń tozý deńgeıi 57 paıyzǵa jetti. Bul týraly Kólik mınıstri Nurlan Saýranbaev málim etti.

— Temirjol jelisiniń jalpy paıdalaný uzyndyǵy 16 myń shyqyrym. Tozý deńgeıi 57 paıyzdy qurady. Bul poıyzdardyń qozǵalys jyldamdyǵy men qaýipsizdigine áser etedi. Osy problemalardy sheshý úshin 2029 jylǵa deıin 5 myń km jańa jol qurylysy men jańartý jumystary atqarylyp jatyr. Sonymen qatar, 11 myń km joldyń jóndeý jumystary jasalyp jatyr. Qazirgi kezde 5 joba boıynsha jańa qurylys jumystary júrip jatyr. Olar: «Dostyq — Moıynty», «Almaty aınalma temirjoly», «Darbaza — Maqtaaral», «Moıynty — Qyzyljar» jáne «Baqty — Aıagóz». Osy jyly merziminen buryn eki iri joba aıaqtalady: «Dostyq — Moıynty» ýchaskesi jáne Almaty aınalma temirjoly, — dedi N. Saýranbaev Úkimet otyrysynda.

Onyń aıtýynsha, kelesi jyly «Moıynty — Qyzyljar» jáne «Darbaza — Maqtaaral» jańa temirjoldary iske qosylady. Sonymen birge, bıyl 3 myń km temirjol ýchaskelerinde tolyq modernızatsııa bastaldy. Bul jumystar jańa joldardy salýmen teń. Mysaly, «Qyzyljar — Sekseýil» ýchaskesiniń ótkizý qabileti 8 poıyzdan 25 poıyzǵa deıin, al «Qandyaǵash — Tobyl» 7-den 25-ke deıin kóteriledi.

Eske salsaq, jaqynda Astana soty jańa vagon satyp almaǵan temirjol kompanııasyn sýbsıdııadan aıyrdy.