Temirjol salasynda Wabtec jáne Huawei-men birge jasandy ıntellekt engizilip jatyr
ASTANA. KAZINFORM – Kólik mınıstri Marat Qarabaev elimizdegi temirjol salasynda jasandy ıntellektini engizý barysy jaıynda túsinik berdi.
- Tsıfrlyq tehnologııalardy qoldaný - salanyń damýynda negizgi faktorlarynyń biri. Temirjol salasynda PSA kompanııasymen birlesip, kedendik jáne tranzıttik bıznes-protsester tsıfrlandy, Wabtec jáne Huawei kompanııalarymen birge jasandy ıntellekt tehnologııalary engizilip jatyr. Logıstıkany ońtaılandyrý úshin «bir tereze» formaty jumys istep tur, - dedi M. Qarabaev Parlament Májilisinde kólik-logıstıkalyq áleýetin damytý taqyrybyna arnalǵan Úkimet saǵatynda.
Onyń aıtýynsha, avtomobıl kóligi boıynsha, osy jyldan bastap elektrondy ruqsat blankterin almasý jáne Kólik qujattaryn basqarýdyń birińǵaı júıesi engizildi.
- Jergilikti ákimdiktermen birlesip 20 avtomattandyrylǵan ólsheý stantsııasy ornatyldy. Avtomobıl joldary salasynda «e-Joldar» júıesi jasaqtalyp jatyr. Azamattyq avıatsııada barlyq áýejaılarda elektrondy qujattar qoldanylýda jáne reıster keshikken kezde jolaýshylardy avtomatty túrde saqtandyrý engizilip jatyr. Mınıstrlik tsıfrlyq damýdyń naqty vektoryn aıqyndady. Bul vektor 5 jyldyq kezeńde Tsıfrlyq transformatsııa kartasy aıasynda júzege asyrylyp jatyr, - dedi mınıstr.
Budan buryn habarlanǵandaı, M. Qarabaev temirjol salasynda iske asyrylyp jatqan iri jobalarǵa túsinik berdi.