Temirjol salasynda qandaı iri jobalar iske asyrylyp jatyr

ASTANA. KAZINFORM – Bıyl 1,4 myń shaqyrym temirjol jóndeldi. Bul týraly Parlament Májilisinde kólik-logıstıkalyq áleýetti damytý taqyrybyna arnalǵan Úkimet saǵatynda Kólik mınıstri Marat Qarabaev málim etti.

- Úlken máselelerdiń biri - magıstraldy temirjol jelisin jańǵyrtý. Onyń tozý deńgeıi qazir 57 paıyz shamasynda. Bıyl 1 myń 401 shaqyrym jol jóndeýden ótti. Tasymaldardyń úzdiksizdigin jáne magıstraldyq temirjoldardyń qýattylyǵyn arttyrý úshin Memleket basshysynyń tapsyrmasy aıasynda 2029 jylǵa deıin 

11 myń shaqyrym temirjol ýchaskelerine jóndeý jumystary júrgizilmek, onyń 2 myń 800 shaqyrymynda tıisti jumystar aıaqtaldy (26%). Sonymen qatar, jalpy uzyndyǵy 5 myń shaqyrymdy quraıtyn (onyń ishinde 1,3 myń km salynyp jatyr) jańa jáne ekinshi joldardyń qurylysy, 2 myń 600 shaqyrymǵa avtoblokırovkany engizý jáne 184 stantsııany modernızatsııalaý josparlanǵan, - dedi M. Qarabaev.

Onyń aıtýynsha, qazirgi kezde «Dostyq – Moıynty» temirjol ýchaskesinde ekinshi joldardyń (836 km) jáne Almaty aınalma jolynyń (74 km) qurylysy jalǵasyp jatyr, sondaı-aq «Darbaza – Maqtaaral» (152 km) jáne «Baqty – Aıagóz» (272 km) jelileriniń qurylysy bastaldy.

- Qazir Qytaı baǵytyndaǵy temirjol ótkizý pýnktteri óz jobalyq qýattylyǵyn tolyq kólemde qoldanýda, ıaǵnı ótkizý múmkindigi 28 mln tonna bolsa, bıylǵa suranys 30 mln tonnany quraıdy. Bul rette, júkterdiń ósip kele jatqan kólemin qamtamasyz etý maqsatynda ótkizý pýnkteriniń qýattylyǵyn arttyrýǵa qatysty kelesi sharalar qabyldanyp jatyr. Birinshiden, «Baqty – Aıagóz» jańa temirjolyn iske asyrý bastaldy, ol jylyna qosymsha 20 mln tonna júk ótkizý múmkindigin beredi. Ekinshiden, Altynkól stantsııasyn jańǵyrtý josparlanǵan, bul onyń ótkizý qabiletin 12-den 21 mıllıon tonnaǵa deıin ulǵaıtýdy qamtamasyz etedi. Úshinshiden, « Dostyq–Moıynty» ýchaskesinde qabyldaý-jóneltý parkteri men termınaldyq ınfraqurylymdy keńeıtý boıynsha jumystar júrgizilip jatyr, bul stantsııanyń ótkizý qabiletin jylyna 16 mln-nan 35 mln tonnaǵa deıin artady. Nátıjesinde, Qazaqstan men Qytaı arasyndaǵy temirjol pýnktileriniń qýattylyǵy 2,5 esege kóbeıip, 76 mln tonnaǵa deıin jetedi, - dedi vedomstvo basshysy.

Onyń sózine qaraǵanda, temirjol salasyndaǵy jańa baǵdarlardyń biri - mýltımodaldyq baǵyttardy qalyptastyrý.

Bul joba barysynda Qytaı men shekarada tórtinshi temirjol ótkizý pýnktin ashyp, Tuǵyl eldi-mekenine deıin 120 shaqyrym temirjol jáne sol jerde ózen portyn salý josparlanǵan.

- Bul endi bastalyp jatqan jańa joba, kelesi jyly mamyr aıynda Qytaı, Qazaqstan jáne Reseı Kólik mınıstrleri deńgeıinde úshjaqty kezdesý ótkizemiz. Joba Ertis ózeninen ári qaraı Ob ózeni arqyly Soltústik teńizderge shyǵa otyryp, Qytaı men Reseı arasynda Qazaqstan aýmaǵymen ótetin jańa mýltımodaldy tranzıttik dálizdi qalyptastyratyn bolady. Tasymaldaýdyń boljamdy kólemi jylyna 2 mln 500 myń tonnany quraıdy, - dedi Marat Qarabaev.

Budan buryn habarlanǵandaı, Qazaqstan lokomıtıvterdiń tozý deńgeıi 61 paıyzdy qurady.