Temirjol ótkelderindegi jol apaty 30%-ǵa azaıdy
ASTANA. KAZINFORM — Bıylǵy jyldyń birinshi toqsanynda temirjol ótkelderinde ótken jyldyń sáıkes kezeńimen salystyrǵanda jol-kólik oqıǵalary sany 30%-ǵa tómendegeni anyqtalyp otyr. Bul týraly «QTJ» ulttyq kompanııasy málim etti.
Desede de temirjol ótkelderindegi qaýipsizdikti saqtaý máselesi áli de ózekti. Oqıǵalardyń negizgi sebebi avtokólik júrgizýshileriniń jol qozǵalysy erejelerin saqtamaýy — tyıym salý sıgnaldaryn elemeý, jaqyndap kele jatqan poıyz aldynan kesip ótý áreketteri jáne jol belgileri talaptaryn buzý bolyp qalyp otyr.
Qaýipsizdikti arttyrý úshin «Qazaqstan temir joly» UK» AQ elimizdiń barlyq óńirlerinde keshendi profılaktıkalyq jumys júrgizilip jatyr.
— Bıylǵy jyldyń birinshi toqsanynda 300 jýyq profılaktıkalyq reıd júrgizildi. 150 myńnan astam júrgizýshi temirjol ótkelderi arqyly ótý erejelerimen tanysty. Ótken jyldan bastap «Qazaqstan temir joly» UK» AQ quqyq qorǵaý organdarymen birlesip bastamashylyq etken temirjoldaǵy apattylyqty tómendetýge jáne tártipti arttyrýǵa baǵyttalǵan zańnamaǵa túzetýler qoldanylyp keledi, — dep jazdy kompanııanyń baspasóz qyzmeti.
Sonymen, buzýshylyqtar úshin jaýapkershilik kúsheıtildi:
— joldardan belgilenbegen oryndar boıynsha ótkeni úshin — 3 AEK, qaıtalansa 5 — AEK;
— mal aıdap ótkeni, kólik-arba kóliginiń qozǵalysy jáne bólingen beldeýde mal jaıǵany úshin — 5 AEK, qaıtalansa –10 AEK;
— temir jol ótkelderiniń júrip ótý erejelerin buzǵany úshin — 20 AEK, zııan keltirilgen kezde júrgizýshi kýáliginen 9 aıǵa deıin aıyrylýy múmkin.
— Temirjolshylar júrgizýshilerdi ótkelderdi kesip ótý kezinde óte muqııat bolýǵa, jol erejelerin qatań ustanýǵa shaqyrady. Temir jol boıynda asyǵystyq tanytý ólimge ákelýi múmkin — poıyz astyna túsý qaýpi joǵary, — dep eskertti.
Eske sala keteıik, byltyr 44 adamdy poıyz basyp ketip, 27 adam kóz jumǵan bolatyn.
