Temirjol konteınerlerinen 212 mln teńgeniń júgin urlaǵan top ustaldy

ASTANA. KAZINFORM — Kóliktegi polıtsııa departamentiniń krımınaldyq polıtsııa qyzmetkerleri Bas kólik prokýratýrasynyń úılestirýimen júrgizgen aýqymdy ári júıeli jumysynyń nátıjesinde temirjol quramdarynyń konteınerlerinen júk urlaýmen aınalysqan qylmystyq toptyń áreketi áshkerelenip, toqtatyldy. 

— 2025 jylǵy sáýir aıynda kólik polıtseıleri Almaty jáne Shyǵys Qazaqstan oblystarynyń turǵyndarynan quralǵan alty adamnan turatyn qylmystyq topty ustady. Tergeý barysynda olardyń 2024 jylǵy tamyzdan 2025 jylǵy sáýirge deıin «QHR-Eýropa» halyqaralyq baǵytymen qatynaǵan poıyzdardyń konteınerlerinen júkterdi júıeli túrde urlap kelgenderi anyqtaldy, — delingen Kóliktegi polıtsııa departamenti habarlamasynda.

Sotqa deıingi tergep-tekserý barysynda atalǵan toptyń tórt urlyq deregine qatysy bar ekeni dáleldendi. Urlanǵan zattardyń ishinde beınebaqylaý kameralary, balalar arbalary jáne kólik bólshekteri bolǵan. Júk ıelerine keltirilgen jalpy shyǵyn 212 mıllıon teńgeden asty.

Qylmystyq toptyń barlyq múshesiniń kinási tolyq dáleldenip, keltirilgen materıaldyq zalal tolyq kólemde óteldi.

Sot sheshimimen olardyń árqaısysyna 4 jyl merzimge bas bostandyǵyn shekteý jazasy taǵaıyndaldy.

Aıta ketelik farmatsevtıka salasyndaǵy qylmystyq shemaǵa qatysy bar laýazymdy tulǵalar qamaýǵa alynǵan edi.