Temirjol yntymaqtastyǵy uıymyna kólik dıplomatııasynyń mańyzdy ınstıtýty retinde basa mán beremiz - Bektenov
ASTANA. KAZINFORM – Temirjol yntymaqtastyǵy uıymynyń ortaq maqsaty – Eýrazııany birtutas ári úzdiksiz jumys isteıtin kólik júıesine aınaldyrý. Bul týraly Temirjoldar yntymaqtastyǵy uıymy konferentsııasynyń 40-otyrysynda Premer-mınıstr Oljas Bektenov aıtty.
- Temirjol yntymaqtastyǵy uıymynyń Bas dırektorlary konferentsııasynyń mereıtoılyq otyrysyn qabyldaý – biz úshin zor mártebe. Ózderińiz biletindeı, Prezıdent Qasym-Jomart Toqaevtyń basshylyǵymen Qazaqstan damýdyń jańa tarıhı kezeńine qadam basty. Jalpyhalyqtyq referendýmda azamattarymyzdyń belsendi qoldaýymen elimizdiń jańa Konstıtýtsııasy qabyldandy. Osy jyldyń 1 shildesinen bastap kúshine enetin Ata zań qoǵamdyq damýdyń jańa modelin qalyptastyryp, el ekonomıkasyn odan ári jańǵyrtýǵa yqpal etedi, - dedi Úkimet basshysy.
Premer-mınıstr ekonomıkanyń asa mańyzdy kúretamyryna aınalǵan temirjol salasy halqymyzdyń ómir sapasyn jaqsartyp, ornyqty ósimdi qamtamasyz etýge eleýli úles qosyp kele jatqanyn basa aıtty.
- Uıymnyń 70 jyldyǵyna oraılastyrylǵan alqaly jıyn toǵyz joldyń torabynda, Eýrazııa qurlyǵynyń dál ortasynda ótip otyr. Munyń máni zor. Zamanaýı ári tıimdi kólik júıesi biz úshin halyqaralyq jetkizý tizbekterine beıimdele otyryp, jahandyq ekonomıkaǵa yqpaldasýǵa múmkindik beredi. Turaqsyz halyqaralyq qatynastar júıesi qalyptasqan qazirgideı kezeńde, biz uıymǵa tehnıkalyq qurylym retinde ǵana emes, sonymen qatar óńirler men elder arasyndaǵy senimdi qatynastarǵa negiz bolyp otyrǵan kólik dıplomatııasynyń mańyzdy ınstıtýty retinde basa mán beremiz, - dedi ol.
Úkimet basshysynyń aıtýynsha, ondaǵan jyldar boıy uıym jumysy eýrazııalyq kólik qaýymdastyǵynyń qatysýshylary úshin kepil bola otyryp, birtutas quqyqtyq jáne tehnologııalyq keńistikti qamtamasyz etip keledi.
- Qazirgi geosaıası jaǵdaıda bizdiń aldymyzda qalyptasqan baılanystardy saqtap qana qoımaı, olarǵa jańa serpin berý, sonyń ishinde tsıfrlyq transformatsııa arqyly nyǵaıta túsý mindeti tur. Bizdiń ortaq maqsatymyz – Eýrazııany birtutas ári úzdiksiz jumys isteıtin kólik júıesine aınaldyrý, - dedi Oljas Bektenov.
