Temirjol ınfraqurylymynyń tozý deńgeıi joǵary — Oljas Bektenov

ASTANA. KAZINFORM — Qytaı shekarasynan Kaspııge deıin júkterdi jetkizý ýaqyty osy jyldyń sońyna qaraı 84 saǵattan 55 saǵatqa deıin qysqarady. Bul týraly Úkimettiń keńeıtilgen otyrysynda Premer-mınıstr Oljas Bektenov málim etti.

— Tranzıttik áleýettiń qarqyndy damýyna keıbir qolaısyz faktorlar áser etip otyr. Temirjol ınfraqurylymynyń tozý deńgeıi joǵary bolyp tur. Júk poıyzdarynyń jyldamdyǵy orta eseppen saǵatyna — 38 shaqyrym. Bul TMD elderine qaraǵanda jyldamyraq bolǵanymen, damyǵan elderden baıaý, — dedi O. Bektenov.

Sondyqtan magıstraldyq temirjol jelisin jańǵyrtýǵa arnalǵan keshendi baǵdarlamany iske asyrý barysy turaqty baqylaýda.

— Bıyl jalpy uzyndyǵy 475 shaqyrym bolatyn eki temirjol jelisiniń qurylysyn jáne 2 900 shaqyrym joldy jańǵyrtý jumystaryn aıaqtaımyz. Bul tranzıttik tasymal kólemin 60%-ǵa ulǵaıtýǵa, al tranzıttik konteınerlik poıyzdardyń jyldamdyǵyn saǵatyna 50 shaqyrymǵa deıin arttyrýǵa múmkindik beredi. Atap aıtqanda, Qytaı shekarasynan Kaspııge deıin júkterdi jetkizý ýaqyty osy jyldyń sońyna qaraı 84 saǵattan 55 saǵatqa deıin qysqarady, — dedi Úkimet basshysy.

Buǵan deıin Úkimet Kómir generatsııasyn damytý jónindegi ulttyq jobany ázirleýge kiriskenin jazǵan edik.