Temirjol, avtojol jáne avıatsııa salasynda aýqymdy jobalar iske asady
ASTANA. KAZINFORM — Qazaqstan Respýblıkasy Premer-mınıstriniń birinshi orynbasary Roman Sklıardyń tóraǵalyǵymen Kólik mınıstrliginiń alqa otyrysy ótti. Іs-sharaǵa Prezıdent Ákimshiliginiń, Úkimet Apparatynyń ókilderi, vedomstvoǵa qarasty uıymdardyń basshylary jáne jergilikti atqarýshy organdardyń ókilderi qatysty. Bul týraly Úkimettiń baspasóz qyzmeti málim etti.
Óz sózinde Premer-mınıstrdiń birinshi orynbasary R. Sklıar alqa otyrysy elimizdegi saıası transformatsııa jáne Qazaqstan Respýblıkasynyń jańa Konstıtýtsııasyn ázirleý aıasynda ótip jatqanyn atap ótti.
— Jańa Konstıtýtsııa jobasy qoǵamnyń belsendiligi men saıası mádenıetin arttyrý sharalaryn kózdeıtin, memleketimizdiń damýynyń sapalyq jańa deńgeıin belgileıtin tujyrymdamalyq jańa qujat bolyp sanalady, — dedi ol.
Jıynda qatysýshylar Memleket basshysynyń tapsyrmalarynyń oryndalýy boıynsha aldaǵy kezeńge arnalǵan basym baǵyttardy aıqyndady.
Temirjol salasynda iri ınfraqurylymdyq jobalar júzege asyryldy. Atap aıtqanda, Dostyq – Moıynty ýchaskesi men Almaty stansasynyń aınalma temirjol jelisi iske qosyldy, 1,5 myń shaqyrymnan astam jol jańartyldy, shamamen 320 mln tonna júk tasymaldandy.
Avtomobıl joldary salasynda 13 myń shaqyrymǵa jýyq jolda qurylys jáne jóndeý jumystary júrgizildi. Qyzylorda – Jezqazǵan (Qyzylorda oblysy aýmaǵyndaǵy), Qalbataý – Maıqapshaǵaı jáne Uzynaǵash – Otar jobalary aıaqtaldy.
Azamattyq avıatsııa salasynda ushý qaýipsizdigi boıynsha IKAO standarttaryna sáıkestik deńgeıi 95,7%-ǵa jetti. Elimizdegi áýejaılar 30 mln-nan astam jolaýshyǵa qyzmet kórsetti, halyqaralyq marshrýttar jelisi keńeıtilýde.
2026 jylǵa arnalǵan josparlar sheńberinde temirjol salasynda «Darbaza – Maqtaaral», «Moıynty – Qyzyljar» jelileriniń qurylysy, «Altynkól – Jetigen» jáne «Beıneý – Mańǵystaý» ýchaskelerin jańǵyrtý jumystaryn aıaqtaý, sondaı-aq «Baqty – Aıagóz» jobasyn jalǵastyrý kózdelgen. Budan bólek, vokzaldardy jańǵyrtý jumystaryn aıaqtaý jáne jolaýshylar men júk vagondary parkin odan ári jańartý josparlanǵan.
Avtojol salasynda jalpy uzyndyǵy 11 myń shaqyrymdy qamtıtyn jol qurylysy men rekonstrýktsııalaý jumystary jalǵasady. Atap aıtqanda, «Qyzylorda – Jezqazǵan» avtojolynda (Ulytaý oblysy aýmaǵynda) jumystar júrgiziledi. «Ortalyq – Batys» jobasyn júzege asyrýdyń belsendi kezeńi bastalady. Sonymen qatar «Qaraǵandy – Jezqazǵan», «Aqtóbe – Qyzylorda» jáne «Beıneý – Sekseýil» jobalaryn bastaý josparlanǵan.
Mýltımodaldy tasymaldy damytý maqsatynda Aqtaý jáne Quryq porttarynyń ınfraqurylymyn jańǵyrtý, onyń ishinde aılaqtardy rekonstrýktsııalaý jáne túbin tereńdetý jumystaryn aıaqtaý kózdelip otyr.
— Áýe habtaryn jáne avıatsııalyq ınfraqurylymdy damytý aıasynda Astana men Shymkentte ekinshi ushý-qoný jolaqtaryn salý, Almaty áýejaıynyń ishki reıster termınalyn jáne Aqtaý áýejaıynyń perronyn rekonstrýktsııalaý, Atyraý qalasynda jańa termınal salý, Pavlodar áýeaılaǵyn jańǵyrtý, Arqalyq áýejaıyn qalpyna keltirý, sondaı-aq Katonqaraǵaı, Zaısan jáne Kendirli kýrorttyq aımaqtaryndaǵy áýejaılar qurylysyn aıaqtaý josparlanyp otyr, — delingen habarlamada.
2026 jyldyń sońyna deıin otandyq áýe kompanııalary 9 jańa áýe kemesin satyp alyp, áýe parkiniń sanyn shamamen 118 birlikke deıin ulǵaıtýdy josparlaýda. Bul jolaýshylar tasymaly syıymdylyǵyn arttyrýǵa, jańa halyqaralyq baǵyttardy ashýǵa jáne reıster jıiligin kóbeıtýge múmkindik beredi.
Alqa otyrysynyń qorytyndysy boıynsha Roman Sklıar kólik-logıstıka salasyn odan ári damytý boıynsha qosymsha mindetterdi aıqyndap, naqty tapsyrmalar berdi.
Aıta keteıik, buǵan deıin Roman Sklıar 2026 jylǵa ónerkásip pen qurylys basymdyqtaryn belgilegen bolatyn.