Temirtaýdan Aqmola oblysynyń shekarasyna 590 avtokólik polıtsııa baqylaýymen ótti
ASTANA. KAZINFORM – Kóktaıǵaq pen jańbyrǵa baılanysty engizilgen ýaqytsha shekteýler alynǵan soń, Temirtaý – Aqmola oblysynyń shekarasy baǵytyndaǵy avtojolda qozǵalys qaıta jandandy. Júzdegen avtokólikten turatyn kolonna polıtsııa qyzmetkerleriniń qatań baqylaýymen júrdi.
Aýa raıynyń jaqsarýyna oraı atalǵan jol ýchaskesinde qozǵalys qaıta qalpyna keltirildi. Buǵan deıin jańbyr jaýyp, kóktaıǵaqtyń paıda bolýyna baılanysty respýblıkalyq mańyzy bar barlyq avtojolda ýaqytsha shekteýler engizilgen bolatyn.
Patrýldik polıtsııa batalonynyń qyzmetkerleri Temirtaý termınalynan Anar kentine deıin avtokólikterdi birlesip ótkizý tártibin uıymdastyrdy. Barlyǵy 590 kólik qatysqan kolonnada 350 jeńil jáne 240 júk kóligi boldy. Qaýipsizdikti qamtamasyz etý úshin polıtsııanyń tórt patrýldik ekıpajy men tórt jol tehnıkasy (KDM) jumyldyryldy.
Qozǵalys bastalar aldynda patrýldik polıtsııa batalony komandıriniń orynbasary Suńǵat Abylqas júrgizýshilerge kolonnamen júrý tártibi men joldaǵy qaýipsizdik talaptary týraly nusqaý berdi. Іlesip júrýdi ózi bastap júrgizdi.
Qaraǵandy oblysynyń polıtsııa departamenti óńirdegi avtojoldardaǵy jaǵdaıdy táýlik boıy baqylaýda ustap, jol qozǵalysynyń qaýipsizdigin qamtamasyz etý boıynsha jumystardy jalǵastyryp jatqanyn habarlady.
Sonymen qatar Tótenshe jaǵdaılar mınıstrligi 6-8 aqpan aralyǵynda aýa raıynyń kúrt ózgerýine baılanysty azamattarǵa shuǵyl eskertý jasaǵan bolatyn. Bul sharalar joldaǵy qaýipsizdikti arttyrýǵa baǵyttalǵan.
Eske salsaq, buǵan deıin 6 aqpanda respýblıka boıynsha qaı joldarda qozǵalys shektelgenin jazǵan edik.