Temirtaýda jylý jelisinde taǵy apat boldy

TEMІRTAÝ. KAZINFORM - Kommýnaldyq apat Temirtaýdyń 7-shaǵynaýdany turǵyndaryn jylý men ystyq sýsyz qaldyrdy. Qalpyna keltirý jumystaryna jóndeý qyzmetteri kiriskenimen, qyzmetterdiń tolyq qashan qalpyna keltiriletini ázirge naqtylanǵan joq.

Temirtaý qalasy ákimdiginiń málimetinshe, 7-shaǵynaýdanda dıametri 150 mm bolatyn jylý jelisinde taǵy jarylys bolǵan. Apatqa baılanysty birqatar kópqabatty turǵyn úılerde, sondaı-aq áleýmettik jáne kommertsııalyq mańyzy bar nysandarda jylytý men ystyq sý berý ýaqytsha toqtatyldy.

Ajyratý aımaǵyna «Gúlder» balabaqshasy, №27 orta mektep, sondaı-aq «Kooperator», «Gvozdıka», «Bıosfera», «Beıbit» jáne «Mıasnoı» nysandary kirdi. Budan bólek, atalǵan jylý jelisinen jylý alatyn taǵy alty kópqabatty turǵyn úıde de jylýmen qamtýda irkilis baıqalyp otyr.

Qalalyq ákimdikte habarlaǵandaı, jóndeý brıgadasy qalpyna keltirý jumystaryna kiristi. Jóndeý jumystarynyń aıaqtalý merzimi men ystyq sý men jylýdyń tolyq berilýi týraly qosymsha aqparat keıinirek jarııalanatyn bolady.

Bul — sońǵy eki apta ishinde Temirtaýdyń jylý jelilerinde tirkelgen úshinshi apat. Eske salaıyq, 13 qańtar kúni osy ýchaskede alǵashqy jarylys bolyp, shamamen 40 kópqabatty turǵyn úı, eki áleýmettik nysan, sondaı-aq Otradnyı shaǵynaýdany men segizinshi shaǵynaýdandaǵy jekemenshik sektor tutynýshylary jylýsyz qalǵan edi. 

Jaǵdaıdy Qaraǵandy oblysyndaǵy qatty aıaz odan ári ýshyqtyrdy. Jóndeý jumystary tek 14 qańtar kúni tústen keıin ǵana aıaqtaldy. 

Al 19 qańtarda Temirtaýda magıstraldyq qubyr qaıta jarylyp, ondaǵan úı jylýsyz qaldy.