Temirtaýda jedel járdem qyzmetkerleri jalaqylaryn kóterýdi talap etip otyr
TEMІRTAÝ. KAZINFORM – Temirtaý qalasynyń jedel járdem qyzmetkerleri buqaralyq aqparat quraldaryna júginip, shamadan tys jumys júktemesi men tómen eńbekaqy máselesin kóterdi. Medıtsınalyq mamandar óz eńbeginiń baǵalanbaı otyrǵanyn aıtyp, jaǵdaıǵa óńirlik jáne respýblıkalyq deńgeıde aralasý qajet ekenin jetkizdi.
Temirtaý jedel járdem stansasynyń qyzmetkerleri jyldar boıy qordalanǵan máseleler jóninde ashyq aıtty. Olardyń qatarynda – eńbekaqynyń mardymsyzdyǵy, kadr tapshylyǵy, tozyǵy jetken avtopark, sondaı-aq eńbek jaǵdaıyna qatysty tıimdi ári túsinikti sheshimder mehanızminiń joqtyǵy.
Feldsherlerdiń aıtýynsha, baspasózge júginý – amalsyz qadam, óıtkeni jergilikti deńgeıde olar óz saýaldaryna naqty túsinikteme de, resmı jaýap ta ala almaǵan.
Shaqyrý brıgadasynyń feldsheri Aıken Androva júktemeniń mamyr aıynan beri aıtarlyqtaı artqanyn aıtady, medıtsına qyzmetkerleri «barlyq sanattaǵy shaqyrýlarǵa» shyǵýǵa májbúr.
«Bizge kún saıyn túsetin júkteme úlken. Shaqyrý kezinde aýyr naýqastardy kóteremiz, bıiktikten qulaǵandarǵa baramyz, densaýlyǵymyzǵa qaýip tóndiremiz. Soǵan qaramastan, alatyn aılyǵymyz óte tómen. Qyrkúıekte jeti aýysym úshin 140 myń teńgeden sál ǵana joǵary eńbekaqy aldym. Bul — adam ómirine jaýapkershilik arqalaıtyn mamannyń jalaqysy», — deıdi ol.
Tómen jalaqy saldarynan kóptegen qyzmetkerler qosymsha jumys isteýge májbúr.
«Táýliktik kezekshilikten soń bir kún demalamyn, al eki kún jeke klınıkada jumys isteımin. Basqa amal joq», — deıdi feldsher.
Temirtaý — 200 myńnan astam turǵyny bar iri ónerkásiptik qala. Normatıvke sáıkes, ár 10 myń turǵynǵa bir jedel járdem brıgadasy bolýy tıis. Alaıda is júzinde táýligine 20 brıgadanyń ornyna nebári 10-11 brıgada ǵana jumys isteıdi. Stansadaǵy kadr tapshylyǵy 20 feldsherge jetip otyr.
Avtoparktiń jaǵdaıy da alańdatarlyq.
«Qosalqy kólikterdiń keıbirinde qaýipsizdik beldikteri istemeıdi. Naýqasty bekitý — mindetti talap. Biraq paıdalanylyp júrgen tehnıka tozǵan. Kólikterdiń basym bóligi 2017 jylǵy, tipti odan da eski mashınalar bar», — deıdi qyzmetkerler.
Oblystyq jedel járdem stansasy basshysynyń mindetin atqarýshy Aqylbek Sarbaev bul derekterdi rastaıdy: avtokólikterdiń jartysynan kóbi tozyǵy jetken.
«Oblysta qarjylyq lızıng arqyly 113 jedel járdem kóligi satyp alynyp jatyr. Jeltoqsannyń sońyna deıin jetkizý josparlanǵan, qujattandyrýǵa bir aıdaı ýaqyt ketedi. Aqpan aıynda Temirtaýdyń avtoparkin tolyq jańartýdy josparlap otyrmyz», — dedi ol.
Alaıda basty másele — eńbekaqy, áli kúnge sheshimin tappaǵan.
«Iá, jalaqynyń tómen ekendigimen kelisemiz. Feldsher — adam ómirin qutqarýǵa jaýapty maman, mundaı eńbekti eń tómengi aılyqpen baǵalaýǵa bolmaıdy. Bul másele boıynsha biz kásipodaqqa da, ortalyq memlekettik organdarǵa da hat joldadyq. Qazir sheshim kútip otyrmyz», — dedi Sarbaev.
Oblystyq densaýlyq saqtaý basqarmasy da qarjylandyrýdy arttyrý máselesi respýblıkalyq deńgeıge shyǵarylǵanyn rastady.
«Qazirgi ýaqytta medıtsınalyq qyzmetkerlerdiń kásipodaǵy eńbek ujymymen kelisim negizinde áleýmettik áriptestik aıasynda QR Densaýlyq saqtaý mınıstrligine jan basyna shaqqandaǵy tarıfti ınflıatsııa deńgeıine sáıkes ulǵaıtý jóninde usynys engizilgen hat joldady. Al avtoparkti jańartýǵa kelsek, bıyl jergilikti atqarýshy organdar oblystyq bıýdjet esebinen 113 jedel járdem kóligin jáne sanavıatsııa úshin eki mashınany satyp alyp jatyr», — dep habarlady vedomstvo.
Jedel járdem qyzmetkerleri buqaralyq aqparat quraldaryna júgingendegi maqsat — shıelenis týdyrý emes, óz daýystarynyń estilýi ekenin aıtady.
«Biz — alǵashqy medıtsınalyq kómek býynymyz. Sizderdiń týystaryńyzǵa, balalaryńyzǵa eń aldymen biz baramyz. Biz adam ómiri úshin kúresemiz. Biz jaı ǵana laıyqty eńbekke laıyqty jalaqy suraımyz. Memleket bizdiń daýsymyzdy estıdi dep senemiz», — deıdi Aıken Androva.
Ákimdik pen oblystyq qurylymdardyń ókilderi kóterilgen máseleler júıeli túrde sheshýdi talap etetinin jáne olar óńirlik ári salalyq deńgeıde qaralatynyn málimdedi.
Eske salsaq, Prezıdent qaza tapqan feldsherdi «Erligi úshin» medalimen marapattaǵan bolatyn.
Al Astana ákimdigi qaza tapqa qalalyq jedel medıtsınalyq járdem stantsııasynyń feldsheri Uldana Myrzýan otbasyna materıaldyq kómek kórsetetini málim boldy.