Temirtaýda jedel járdem feldsheri soqqyǵa jyǵyldy

TEMІRTAÝ. KAZINFORM – Temirtaýda jedel járdem qyzmetkerin áriptesi soqqyǵa jyqqan. Uryp-soǵý faktisi boıynsha qylmystyq is qozǵaldy.

Oqıǵa 13 sáýirde Temirtaý qalasynyń jedel járdem qosalqy stantsııasynyń aýmaǵynda bolǵan. Oblystyq jedel medıtsınalyq járdem stantsııasynyń ákimshiliginen habarlaǵandaı, eki áriptes arasyndaǵy janjal jumysqa qatysty týyndamaǵan. 

– Eki qyzmetker arasyndaǵy daýly oqıǵa olardyń kásibı mindetterin oryndaý kezinde jáne jumys barysyna qatysty bolmaǵan. Áriptesin soqqan qosalqy stantsııa qyzmetkeri kezekti eńbek demalysynda júrgen. Ol qyzmettik úı-jaılar aýmaǵyna zańsyz kirip ketken, - dep túsindirdi mekemedegiler.

Qazirgi ýaqytta kúdikti ustaldy jáne oǵan qatysty qylmystyq is qozǵaldy.

– Temirtaý qalasynyń 30 jastaǵy turǵynyna dene jaraqatyn salý faktisi boıynsha 29 jastaǵy kúdikti ustaldy jáne polıtsııaǵa jetkizildi. Atalǵan oqıǵa boıynsha sol kúni qylmystyq is qozǵaldy. Zardap shekken qyzmetkerdiń emdeý kýrsy aıaqtalǵannan keıin saraptamalar taǵaıyndalady. Sotqa deıingi tergep-tekserý sheńberinde oqıǵanyń mán-jaıyn, sondaı-aq quqyq buzýshylyqtyń jasalýyna yqpal etken sebepter men jaǵdaılardy anyqtaý úshin barlyq qajetti tergeý áreketi júrgizilip jatyr, - dep habarlaıdy Qaraǵandy oblysy PD baspasóz qyzmeti.

Jedel járdem qyzmetiniń ákimshiligi de ashýǵa boı aldyryp, tártip buzǵan qyzmetkerin jaýapqa tartpaq. 

– Kezekti eńbek demalysy aıaqtalǵannan keıin qosalqy stantsııa ákimshiligi atalǵan qyzmetkerge qatysty tártiptik sıpattaǵy qatań sharalar qabyldaıdy. Zardap shekken feldsherge barlyq qajetti medıtsınalyq kómek kórsetiledi. OJMJS ákimshiligi onyń quqyqtaryn qorǵaýǵa jan-jaqty kómek kórsetedi, - dep tolyqtyrdy oblystyq jedel medıtsınalyq járdem stantsııasy.

Osyǵan deıin Densaýlyq saqtaý mınıstri Aqmaral Álnazarova jedel járdem qyzmetin jergilikti atqarýshy organdardyń quzyretine berýdi usynǵany jaıly jazǵan bolatynbyz.