Temirtaýda Jastar saıasaty jónindegi keńestiń kóshpeli otyrysy ótti
ASTANA. KAZINFORM — Erlan Qarın sapar aıasynda ishki saıasat máseleleri boıynsha jıyn ótkizdi, dep habarlaıdy Aqordanyń baspasóz qyzmeti.
Basqosýǵa Qaraǵandy oblysynyń ákimi Ermaǵanbet Bólekpaev, qala jáne aýdan ákimderi, aımaqtaǵy memlekettik organdardyń basshylary qatysty.
Jıynda Memleket basshysy Ulttyq quryltaıdyń IV otyrysynda aıqyndap bergen mindetterdi júzege asyrý, ishki saıasat salasyndaǵy jumystyń basym baǵyttary, sonyń ishinde qoǵamdyq kelisimdi, etnosaralyq jáne dinaralyq tatýlyqty nyǵaıtý, onomastıka, aqparat jáne jastar saıasaty máseleleri talqylandy.
Odan keıin Memlekettik keńesshi óńirdiń shyǵarmashylyq jáne ǵylymı ıntellıgentsııa ókilderimen kezdesý ótkizdi. Pikir almasý barysynda Erlan Qarın Ulttyq quryltaıda Prezıdent kótergen áleýmettik jáne mádenı-gýmanıtarlyq bastamalar týraly aıtty.
Budan bólek, Memlekettik keńesshi Qazaqstan Respýblıkasy Prezıdenti janyndaǵy Jastar saıasaty jónindegi keńestiń kóshpeli otyrysyn ótkizdi. Basqosýda Qazaqstan jastaryn jumyspen qamtý jáne jumysshy mamandyqtarynyń mártebesin kóterý máseleleri talqylandy. Keńes otyrysy aımaqtaǵy eń iri óndiristik kásiporyn – «Qarmet» metallýrgııalyq kombınatynda uıymdastyrylǵanyn atap ótken jón.
Sapar qorytyndysy boıynsha jastar saıasaty jáne mádenı-gýmanıtarlyq damý baǵytynda atqarylyp jatqan jumysty jetildirýge qatysty naqty usynystar ázirlenip, memlekettik organdarǵa tapsyrmalar berildi.
Buǵan deıin habarlanǵandaı, QR Memlekettik keńesshisi Erlan Qarın sheteldik kózderden qarjy alatyn úkimettik emes uıymdar men azamattyq belsendiler qyzmeti týraly pikirin bildirdi.