Temirtaýda zańsyz jumys istegen maınıng fermasy anyqtaldy

ASTANA. KAZINFORM - Temirtaý qalasynda zańsyz maınıng fermasyn uıymdastyrý faktisi anyqtaldy, dep habarlaıdy Qarjylyq monıtorıng agenttigi.

Agenttiktiń málimetine qaraǵanda kúdiktiniń Temirtaý qalasyndaǵy óndiristik baza aýmaǵynda metall konteınerlerde krıptovalıýta óndirý úshin arnaıy jasalǵan esepteý qurylǵylarynyń keshenin ornatqany anyqtaldy.

— Tintý barysynda obektiden 156 birlik maınıng jabdyqtary (ASIC) jáne basqa da qosalqy qurylǵylar tabylyp, tárkilendi. Qazirgi ýaqytta aldyn ala tergeý júrgizilýde. Tergeý aıasynda Qazaqstan Respýblıkasy Qylmystyq is júrgizý kodeksiniń 201-babyna sáıkes basqa aqparattar jarııalanýǵa jatpaıdy, — delingen Qarjylyq monıtorıng agenttiginiń habarlamasynda.

Osy jyldyń basynan beri zańsyz maınıngtik fermalardy uıymdastyrýdyń 11 faktisi anyqtaldy, olardyń qylmystyq tabysynyń jalpy somasy 440 mıllıon teńgeni qurady. Tergeý barysynda 269 mıllıon teńge somasynda maınıngtik jabdyqtary tárkilenip, 373 mıllıon teńge somasynda tsıfrlyq aktıvter óndirildi. Sotqa jiberilgen eki qylmystyq is boıynsha jalpy qylmystyq tabys 216 mıllıon teńgeni qurady. Osy ister sheńberinde 1,1 mıllıard teńgelik múlik pen 30 mln teńgeden astam tsıfrlyq aktıvter tárkilendi.

Buǵan deıin habarlaǵanymyzdaı pavlodarlyq kásipkerler zańsyz maınıngten 100 mln teńgege jýyq paıda tapqan.