Temirtaýda úsh bala qurylys alańynda elektr toǵynan zardap shekti

TEMІRTAÝ. KAZINFORM – Temirtaý qalasyndaǵy turǵyn úı qurylysy júrgizilip jatqan aýmaqta úsh kámeletke tolmaǵan bala elektr toǵynan zardap shekti. 

Kommýnaldyq jelilerge qyzmet kórsetetin «RES» JShS mamandary oqıǵa ornynda jedel áreket etip, qosalqy stantsııadan beriletin elektr qýatyn tolyqtaı óshirdi. Qazirgi ýaqytta atalǵan aýmaq elektr qýatynan tolyǵymen ajyratylǵan. Qaýipsizdikti qamtamasyz etý maqsatynda kabel jelisin demontajdaý jumystary júrgizilip jatyr. 

Temirtaý qalasynyń ákimdigi oqıǵany baqylaýda ustap otyrǵanyn habarlady. Ákimdik ókilderiniń málimetinshe, oqıǵa bolǵan aýmaq qurylys nysany bolyp, belgilengen talaptarǵa sáıkes qorshalǵan. Oqıǵaǵa baılanysty barlyq qajetti shara qabyldanǵan: elektr qýaty óshirilip, tehnıkalyq jumystar bastalǵan. Qaýipsizdik talaptarynyń saqtalýyna qosymsha tekseris júrgizilýde. 

Qaraǵandy oblysynyń densaýlyq saqtaý basqarmasy zardap shekken balalardyń barlyǵy medıtsınalyq mekemege jedel jetkizilgenin habarlady. Aýrýhanaǵa túsken kezde balalardyń jaǵdaıy ortasha aýyrlyqta jáne turaqty dep baǵalanǵan. Olar keshendi konservatıvti em qabyldap, emdeý nátıjesinde oń dınamıka baıqalǵan. Qazirgi ýaqytta naýqastar beıindi bólimshege aýystyrylǵan. 

Qaraǵandy oblysy polıtsııa departamenti oqıǵa boıynsha sotqa deıingi tergeý bastalǵanyn habarlady. 

Eske sala keteıik, buǵan deıin Densaýlyq saqtaý mınıstrligi Qaraǵandydaǵy balanyń ólimine qatysty málimdeme jasaǵan bolatyn.