Temirtaýda óndiristik tseh qaıta jańǵyrtyldy
TEMІRTAÝ. KAZINFORM — Birneshe jyl boıy toqtap turǵan soǵý-presteý tsehy jaqyn arada Qarmet metallýrgııalyq kombınatynyń óndiristik úderisine qaıta qosylmaq. Nysandy aýqymdy jańǵyrtý jumystary aıaqtalýǵa jaqyndap, kásiporyn úshin jóndeý jumystaryn óz kúshimen qamtamasyz etýge jańa múmkindikter ashyp otyr. Mamandardyń baǵalaýynsha, tsehtyń iske qosylýy óndiristiń tıimdiligin arttyryp, syrtqy merdigerlerge táýeldilikti edáýir qysqartýǵa múmkindik beredi.
Qarmet metallýrgııalyq kombınatynda óndiristi jańǵyrtý baǵdarlamasy aıasynda kásiporynnyń tehnologııalyq tizbegindegi mańyzdy býyn sanalatyn soǵý-presteý tsehyn qalpyna keltirý jumystary aıaqtalýǵa taıady. Paıdalanýǵa berilgennen keıin bul tseh kombınattyń ishki qajettilikterin tolyq qamtamasyz etip, jóndeý jáne jabdyqtardy, qyzmet kórsetý kezinde qajet bolatyn arnaıy elementterdi, bólshekter men agregattarǵa arnalǵan qosalqy bólshekterdi óz ishinde óndirýge múmkindik beredi.
Atalǵan tsehtyń jumysy 2019 jyly shatyr plıtalary men qabyrǵa panelderiniń apatty jaǵdaıyna baılanysty toqtatylǵan bolatyn. Sodan beri birneshe jyl boıy nysan paıdalanylmaı turdy. Tek 2024 jyly alańda demontaj jumystary bastalyp, 2025 jyly joba qurylys pen qalpyna keltirýdiń belsendi kezeńine ótti.
— Búgingi tańda aıtarlyqtaı kólemde jumystar atqaryldy. Shatyr tolyqtaı aýystyrylyp, zamanaýı jeńildetilgen shamdar ornatyldy, jańa qabyrǵa panelderi montajdaldy, jekelegen konstrýktsııalyq elementter kúsheıtildi. Tekserý nátıjeleri boıynsha beton baǵanalardyń bir bóligin saqtaý týraly sheshim qabyldandy — ol úshin olar bandajdalyp, metall qańqamen kúsheıtildi. Sonymen qatar tereze qurylymdary da aýystyryldy, — dedi kompanııa ókilderi.
Kásiporyn ókilderiniń aıtýynsha, qaıta jańǵyrtý barysynda ǵımarattyń negizgi konstrýktsııalyq erekshelikterin saqtaı otyryp, ony qazirgi zaman talaptaryna saı etip aıtarlyqtaı jańartý múmkin bolǵan. Aýyr beton panelderiniń ornyna jańa materıaldardy qoldaný konstrýktsııalarǵa túsetin júktemeni azaıtyp qana qoımaı, nysannyń senimdiligin arttyrdy, sondaı-aq ony ári qaraı paıdalaný men tehnıkalyq qyzmet kórsetýdi jeńildetti.
Qazirgi ýaqytta tsehqa irgeles aýmaqta abattandyrý jumystary júrgizilýde. Sonymen qatar ishki ınfraqurylymdy daıyndaý jalǵasyp jatyr: ınjenerlik jelilerdi jańartý, kópirli krandardy aýystyrý, elektr júıesin, santehnıka men jylytý júıelerin jańǵyrtý josparlanǵan. Kompanııa zamanaýı jabdyqtardy da satyp alǵan, olar jaqyn arada óndiris alańyna jetkizile bastaıdy.
Soǵý-presteý tsehyn qaıta qalpyna keltirý kombınat úshin strategııalyq mańyzǵa ıe. Qazirgi tańda qajetti jumystardyń bir bóligi syrtqy uıymdardy tartý arqyly oryndalyp keledi, bul qyzmet kórsetý merzimine de, qunyna da áser etedi. Tseh tolyq iske qosylǵannan keıin Qarmet jóndeý jumystaryna qajet bólshekter men elementterdi óz kúshimen óndire alady jáne óndiristik jabdyqtardy úzdiksiz jumys kúıinde ustaýǵa múmkindik alady.
Jospar boıynsha soǵý-presteý tsehy bıyl tolyqqandy jumysyn qaıta bastaıdy. Bul joba Qarmet kompanııasynyń jańǵyrtýǵa degen jańa kózqarasynyń aıqyn kórinisi retinde baǵalanyp otyr: ýaqytsha sheshimdermen shektelmeı, óndiristik nysandardy keshendi túrde qalpyna keltirip, olardyń senimdiligin, qaýipsizdigin jáne tıimdiligin uzaq merzimdi perspektıvada arttyrý.
