Temirtaýda múgedektigi bar adamdarǵa qyzmet kórsetpegen kómekshiler 5 mln teńgeden astam aqsha alǵan
ASTANA. KAZINFORM — Temirtaýda múgedektigi bar adamdardyń jeke kómekshilerine is júzinde kórsetilmegen qyzmetter úshin bıýdjetten 5 mln teńgeden astam qarajat tólengen. Zańsyz tólemderdi prokýratýra anyqtady.
Temirtaý prokýratýrasy áleýmettik qyzmetter kórsetý salasyndaǵy zańnamanyń saqtalýyna júrgizilgen taldaý barysynda bıýdjet qarajatyn negizsiz jumsaý faktilerin anyqtady.
Atap aıtqanda, jeke kómekshiler naqty kórsetilmegen qyzmetter úshin aqy alǵan. Sondaı-aq Qazaqstannan tys jerde júrgen kezeńderine qyzmet kórsetý aktilerin rásimdep, eńbek zańnamasyn buzǵan jaǵdaılar tirkeldi.
Taldaý nátıjesinde múgedektigi bar adamdardyń týystary bolyp tabylatyn jeke kómekshilerge formaldy túrde rásimdelgen aktiler negizinde 5 mln teńgeden astam qarajat negizsiz eseptelgeni belgili boldy.
— Qazaqstan Respýblıkasy Áleýmettik kodeksiniń 163-babynyń 2-tarmaǵyna sáıkes, jeke kómekshi birinshi toptaǵy, júrip-turýy qıyn múgedektigi bar adamdarǵa kúnine segiz saǵattan aspaıtyn ýaqyt qyzmet kórsetedi. Tólem naqty kórsetilgen qyzmet ýaqytyna ǵana júrgizilýge tıis. Mysaly, jeke kómekshilerdiń biri 2026 jylǵy sáýirde jalpy uzaqtyǵy 240 saǵat bolatyn qyzmet kórsetý aktisin usynǵan. Alaıda tekserý barysynda onyń 16-24 sáýir aralyǵynda Túrkııanyń Ystanbul qalasynda bolǵany anyqtaldy. Osy kezeńde ol múgedektigi bar adamǵa is júzinde qyzmet kórsetpegen, biraq bul ýaqyt tólemge usynylǵan aktige engizilgen, — dep habarlady prokýratýra.
Vedomstvonyń málimetinshe, osyndaı zań buzýshylyqtar basqa jaǵdaılarda da anyqtalǵan.
Prokýratýranyń qadaǵalaý sharalarynan keıin zańdylyqty qalpyna keltirý boıynsha tıisti jumystar júrgizildi. Jeke kómekshi bolǵan týystary negizsiz alǵan aqshany memleketke erikti túrde qaıtardy.
Prokýratýra naqty kórsetilmegen qyzmetter úshin tólem alý jáne qyzmet kórsetý aktilerin formaldy túrde rásimdeý zań talaptaryna qaıshy ekenin eskertti. Mundaı áreketter zańda kózdelgen jaýaptylyqqa ákep soǵýy múmkin.
