Temirtaýda magıstraldyq qubyr qaıta jarylyp, ondaǵan úı jylýsyz qaldy

TEMІRTAÝ. KAZINFORM - Qaraǵandy oblysynda aıaz kúsheıgen shaqta Temirtaý qalasynda magıstraldyq jylý jelisinde taǵy bir apat tirkeldi. Sonyń saldarynan ondaǵan turǵyn úı men birqatar áleýmettik nysan jylýdan ýaqytsha ajyratyldy. Bul – sońǵy birneshe kún ishinde dál osy ýchaskede bolǵan ekinshi apat.

Eske salaıyq, 13 qańtarda atalǵan magıstralda alǵashqy apat bolǵan edi. https://kaz.inform.kz/news/temrtauda-40-ka-zhuik-kopkabatti-uy-zhilusiz-kaldi-839624/ Sol kezde «Otradnyı» shaǵynaýdany men segizinshi shaǵynaýdanda ornalasqan shamamen 40 kópqabatty turǵyn úı, eki áleýmettik nysan jáne jeke sektor tutynýshylary jylýsyz qalǵan.

Aımaqtaǵy qatty aıaz jaǵdaıdy odan ári ýshyqtyryp, turǵyndar úshin eleýli qolaısyzdyq týǵyzdy. Apat saldaryn joıý jumystary tek 14 qańtar kúni tústen keıin ǵana aıaqtalyp, jylý qaıta berilgen bolatyn.

Bul joly kezekti aqaý 1970-jyldary salynǵan, dıametri 400 mıllımetr bolatyn magıstraldyq jylý qubyrynan anyqtaldy. Atalǵan jeli «Otradnyı» jáne segizinshi shaǵynaýdandardy jylýmen qamtamasyz etedi. Oqıǵa ornyna jedel túrde avarııalyq-qalpyna keltirý brıgadalary tartyldy. Qazirgi ýaqytta apat tolyqtaı joıylǵan.

– Segizinshi shaǵynaýdan boıynsha jaǵdaı turaqtandyryldy. Qazirgi sátte barlyq jóndeý jumystary aıaqtalyp, jylý jelilerin toltyrý jumystary júrgizilip jatyr, - dedi Temirtaý qalasy ákiminiń turǵyn úı-kommýnaldyq sharýashylyq máseleleri jónindegi orynbasary Rınat Qydyrbekov.

Qala ákimdiginiń málimetinshe, Temirtaýdaǵy jylý jelileriniń 75 paıyzdan astamy tozǵan. Injenerlik ınfraqurylymdy jańǵyrtý men jóndeýge búginge deıin 25 mıllıard teńgeden astam qarjy jumsalǵan. Al qalǵan ýchaskelerdi tolyq qalpyna keltirý úshin shamamen 45 mıllıard teńge qajet.

Bıyl qala ulttyq joba aıasynda qarjylandyrýǵa ótinim berip, Energetıka mınıstrligi aldyn ala maquldaǵan.