Temirtaýda magıstraldyq apattan keıin turǵyn úılerge jylý berildi

TEMІRTAÝ. KAZINFORM — Temirtaýda túngi apattyq-qalpyna keltirý jumystarynan keıin segizinshi jáne Otradnoe shaǵyn aýdandaryndaǵy turǵyn úılerge jylý kezeń-kezeńimen qaıta qosyldy. Kommýnaldyq qyzmetter magıstraldyq jylý qubyryndaǵy aqaýdy joıyp, júıeni tehnologııalyq toltyrý jáne retteý jumystaryna kiristi.

Qalada iri kommýnaldyq apattyń saldary joıyldy. Qatty aıaz kezinde apat saldarynan shamamen 40 kópqabatty turǵyn úı, jeke sektor, sondaı-aq bıznes pen áleýmettik sala nysandary jylýsyz qalǵan edi. Aqaý segizinshi jáne Otradnoe shaǵyn aýdanyn jylýmen qamtamasyz etetin magıstraldyq jylý jelisinde bolǵan. 

Apat keshki ýaqytta tirkelip, qoǵamdyq rezonans týǵyzdy: tótenshe jaǵdaı týraly aqparat áleýmettik jeliler arqyly jyldam taraı bastaǵan edi. Qala ákimdiginiń málimetinshe, oqıǵaǵa 1970-jyldardan beri kúrdeli jóndeýden ótpegen, tozyǵy jetken qubyr ýchaskesi sebep bolǵan.

Temirtaý qalasynyń ákimi Ǵalym Áshimovtiń aıtýynsha, jóndeý jumystary tańǵy ýaqytta tolyq aıaqtalǵan.

— Segizinshi shaǵynaýdanǵa qyzmet kórsetetin magıstraldyq jylý jelisindegi jumystar támamdaldy. Odan keıin júıe tehnologııalyq toltyrýǵa berildi. Bul úderis shamamen bir jarym-eki saǵatqa sozylady. Qazirgi kezde barlyq ýchaskelerde jumystar aıaqtalyp, aýa shyǵarý júrgizilýde, qysym birtindep kóterilip, jylý turǵyn úılerge jetkizilýde, — dedi qala basshysy.

Ákimniń sózinshe, apattyq-qalpyna keltirý brıgadalary táýlik boıy, úzdiksiz rejımde jumys istep, barlyq qajetti kúshter men tehnıka tartylǵan. Qazirgi ýaqytta jylýmen qamtý qalypty, shtattyq rejımde qalpyna keltirilip jatyr.

Qala ákimdiginde jaǵdaı turaqty baqylaýda ekeni atap ótilip, barlyq turǵyn úılerge jylýdyń tolyq berilgeni jónindegi aqparat qosymsha habarlanatyny aıtyldy.