Temirtaýda gaz jarylyp, úı ıesiniń denesin 75% kúıik shaldy
TEMІRTAÝ. KAZINFORM – Temirtaýda 18 qyrkúıek kúni tańerteń jeke turǵyn úıde gaz-aýa qospasy tutanǵan. Oqıǵa saldarynan úıdiń 67 jastaǵy ıesi zardap shekti. Zeınetker aýyr kúıik alyp, qazir jansaqtaý bóliminde jatyr.
Tótenshe jaǵdaı saǵat 06:00 shamasynda Pýshkın kóshesinde bolǵan. Kórshileri qatty jarylys dybysyn estip, qutqarýshylardy shaqyrǵan. Jarylys tolqynynan úıdiń terezeleri men esikteri ushyp, qabyrǵasy zaqymdanǵan. As bólmesi tolyǵymen qırap, tóbesinde jaryqtar paıda bolǵan.
Temirtaý qalalyq tótenshe jaǵdaılar basqarmasynyń aldyn ala málimetinshe, oqıǵaǵa gaz-aýa qospasynyń tutanýy sebep bolýy múmkin.
– 18 qyrkúıek saǵat 06:11-de Temirtaý qalasy Pýshkın kóshesinde ornalasqan jeke turǵyn úıde aldyn ala málimet boıynsha tabıǵı gazdyń gaz-aýa qospasy tutanǵan. Sonyń saldarynan turǵyn úıdiń tereze bloktary men qabyrǵasy zaqymdandy. Jedel járdem brıgadasy 1959 jyly týǵan úı ıesin denesiniń termııalyq kúıikterimen Temirtaý qalasynyń ortalyq aýrýhanasyna jetkizdi, – dep habarlady Temirtaý qalalyq tótenshe jaǵdaılar basqarmasy.
Oqıǵa kezinde er adam úıde jalǵyz bolǵan. Jedel járdem brıgadasy ony Temirtaý qalasynyń ortalyq aýrýhanasyna jetkizdi.
– Naýqas qazir jansaqtaý bóliminde jatyr. Onyń denesiniń 75 paıyzy kúıgen, sondaı-aq soǵylǵan. Jaǵdaıy aýyr, – dep habarlady Qaraǵandy oblysynyń densaýlyq saqtaý basqarmasy.
Gaz qyzmetiniń málimetinshe, úıdegi gaz jabdyǵy jaqynda ǵana ornatylǵan. Jarylysqa sebep boldy dep qarastyrylyp jatqan nusqalarynyń biri – gazdy óz betinshe qosý. Alaıda zardap shekken adamnyń týystary bul nusqamen kelispeıdi jáne saraptama júrgizýdi talap etip otyr.
Oqıǵanyń naqty sebebi ázirge anyqtalǵan joq. Qazirgi ýaqytta bolǵan jaǵdaıdyń barlyq mán-jaıy anyqtalyp jatyr.
Temirtaý qalasy polıtsııa basqarmasynyń Eski qala bóliminde qylmystyq is qozǵaldy.
Eske salsaq, Aqtóbe qalalyq №2 sotynda oblys ortalyǵyndaǵy gaz quıý beketiniń ıesine qatysty sot otyrysy bastaldy.
Oǵan Qylmystyq kodekstiń 281-baby 3-bóligimen aıyp taǵyldy. Bıyl 19-maýsym kúni kólik órtenip, onyń ishinde bolǵan eki kishkentaı qyz ben onyń anasy tirileı janyp ketti.
