Temirtaýda erli-zaıyptynyń ólimine qatysty is qozǵaldy
TEMІRTAÝ. KAZINFORM — Qaraǵandy oblysynyń Temirtaý qalasynda 52 jastaǵy er adam men 49 jastaǵy áıeldiń ólimine baılanysty qylmystyq is tergelip jatyr. Olardy óltirdi degen kúdikpen marqumdardyń 20 jastaǵy uly ustaldy.
Qaıǵyly oqıǵa 7 qazanda Respýblıka dańǵylyndaǵy páterlerdiń birinde bolǵan. Polıtsııaǵa eki adamnyń máıiti tabylǵany týraly habar túsken.
Atalǵan derek boıynsha «Adam óltirý» baby negizinde qylmystyq is qozǵaldy. Jedel-izdestirý sharalary barysynda polıtsııa qyzmetkerleri qylmysqa qatysy bolýy múmkin adamnyń jeke basyn anyqtaǵan. Ol marqumdardyń 20 jastaǵy uly bolyp shyqty. Kúdikti ustalyp, ýaqytsha ustaý ızolıatoryna qamaldy.
— Qazirgi ýaqytta tergeý amaldary júrgizilip jatyr. Tergeý múddesine baılanysty ózge aqparat jarııa etilmeıdi, — dep habarlady Qaraǵandy oblysy polıtsııa departamentiniń baspasóz qyzmeti.
Qazir oqıǵanyń mán-jaıy anyqtalyp jatyr.
Buǵan deıin Taraz qalasynda 24 jastaǵy er adamdy óltirdi degen kúdikpen azamat ustalǵanyn habarlaǵan bolatynbyz.
