Temirtaýda ballon gazyna tyıym salyndy: turǵyndar alańdaýly
TEMІRTAÝ. KAZINFORM - Temirtaýda gazben qamtýǵa qatysty jaǵdaı kúrdelene tústi. Sonyń saldarynan turǵyndardyń bir bóligi amalsyzdan elektr plıtalaryn qoldanýǵa kóship jatyr. Qala halqy órt shyǵý qaýpi, elektr jelileriniń shamadan tys júktelýi jáne naqty balamanyń joqtyǵy týraly aıtyp dabyl qaǵyp jatyr. Al bılik ókilderi jaǵdaıdy qaýipsizdik talaptarymen jáne jetkizýshi kompanııanyń mindettemelerin oryndamaýymen túsindirip otyr.
Temirtaýda kópqabatty turǵyn úılerdi gazben qamtý máselesi ýshyǵyp otyr. Gaz ballondaryn paıdalanýǵa shekteý qoıylǵannan keıin turǵyndar jappaı elektr plıtalaryna kóship jatyr. Alaıda olar mundaı ózgeriske qaladaǵy elektr jelileri daıyn emes ekenin aıtyp, alańdaýshylyq bildirdi.
Qala turǵyny Natalıa Gýbına eski úıler joǵary elektr júktemesine eseptelmegenin aıtady.
– Bizdiń úıler elektr plıtalaryna arnalmaǵan. Sym júıesi múlde kótermeıdi. Úı 1962 jyly salynǵan, sodan beri elektr symdary bir ret te aýystyrylǵan joq, – deıdi ol.
Onyń sózinshe, jańa rozetka ornatý da máseleni sheshpeıdi. Sebebi ortalyq jeliniń ózi mundaı qýatty kótermeýi múmkin. Al elektr plıtasynyń qýaty keminde 3,5 kılovatt bolady. Eski úıler mundaı júktemege beıimdelmegen.
Turǵyndardyń alańdaýshylyǵyn Antonına Lıhýtova da qoldaıdy. Onyń aıtýynsha, aldaǵy ýaqytta ot jaǵyp, peshke qaıta oralýy ábden múmkin.
– Endi tamaqty nemen pisiremiz? 90-jyldardaǵydaı dalaǵa shyǵyp ot jaǵatyn shyǵarmyn. Turmystyq tehnıkalar júktemege shydamaıdy: mıkrotolqyndy pesh gýildeıdi, symdar eski, qysqa tuıyqtalý bolyp, órt shyǵyp kete me dep qorqamyn. Qazir bári plastık qoı, – deıdi ol.
Temirtaýlyqtar sondaı-aq barlyq adamnyń birden elektr plıta satyp alýǵa shamasy jetpeıtinin aıtady. Olardyń pikirinshe, mundaı tyıym kezeń-kezeńimen engizilýi kerek edi. Sebebi buǵan qajetti ınfraqurylym daıyndalmaǵan. Qala turǵyndary aldymen gaz júıesin rettep alyp, sodan keıin ǵana shekteý engizý qajet bolǵanyn alǵa tartady.
Másele áleýmettik osal toptarǵa da áser etken.
– Men 93 jastamyn. Mende elektr plıta joq. Nege men ash otyrýym kerek? Aldymen gaz júrgizip berińizder, sodan keıin tyıym salyńyzdar, – deıdi Galına Bezotechestvo narazylyǵyn bildirip.
Temirtaý ákimdigi jaǵdaı jetkizýshi kompanııanyń mindettemelerin oryndamaýyna baılanysty ekenin túsindirdi.
– «Gaz Inpeks» JShS kelisimsharttaǵy mindettemelerin oryndamaı otyr. Gaz retteý qondyrǵylaryn toltyrý jumystary júrgizilmeıdi, – delingen resmı habarlamada.
Bılik ókilderiniń málimetinshe, qazirgi tańda kelisimshartty buzý rásimi zań aıasynda júrgizilip jatyr.
– Ákimdik tarapynan kelisimshartty buzý týraly habarlama joldandy. Qazir birjaqty tártippen buzý rásimi júrgizilip jatyr. Osydan keıin jańa jetkizýshi anyqtalady, – dep málimdedi Temirtaý qalasynyń ákimdigi.
Sondaı-aq ákimdik kópqabatty úılerde ekinshi qabattan joǵary ballon gazyn paıdalanýǵa zań boıynsha tyıym salynǵanyn eske saldy.
– Bul talaptar eń aldymen qaýipsizdik máselesine baılanysty engizilgen. Qalada buǵan deıin ballon gazyna qatysty tótenshe jaǵdaılar tirkelgen, – dep atap ótti ákimdikte.
Bılik ókilderi qaladaǵy elektr jelileri turaqty jumys istep turǵanyn da málimdedi.
– Qalanyń elektr jelileri shtattyq rejımde jumys istep jatyr. Qosymsha qýat jańa tutynýshylardy qosýǵa múmkindik beredi, – delingen habarlamada.
Al zańgerler men sarapshylar máseleniń quqyqtyq jaǵyna nazar aýdaryp otyr. Qoǵam belsendisi ári zańger Anton Polıakov bul jaǵdaı jan-jaqty baǵalaýdy qajet etedi dep esepteıdi.
– Balama joq jáne jeliler tozǵan jaǵdaıda adamdar tyǵyryqqa tireledi. Ótpeli kezeńniń, ótemaqynyń jáne ınfraqurylymdy jańǵyrtýdyń bolmaýy jelilerdiń shamadan tys júktelýine jáne tótenshe jaǵdaılarǵa ákelýi múmkin, – deıdi zańger.
Temirtaýdaǵy gazben qamtý máselesi ázirge sheshimin tapqan joq jáne quqyqtyq retteý kezeńinde tur. Ákimdik qazirgi jetkizýshimen kelisimshart buzylǵannan keıin úılerge gaz jetkizýdi qamtamasyz etetin jańa operator anyqtalatynyn habarlady. Gazben qamtý qashan tolyq qalpyna keltiriletini jóninde barlyq rásim aıaqtalǵan soń qosymsha aqparat berilmek.
Buǵan deıin Túrkistan oblysy Maqtaaral aýdanyna qarasty Táńirbergen Jaılybaev aýylynyń turǵyndary jańadan tartylǵan gaz jelisiniń sapasyna shaǵymdanǵany týraly habarlaǵan bolatynbyz.
