Temirtaýda 40-qa jýyq kópqabatty úı jylýsyz qaldy
TEMІRTAÝ. KAZINFORM — Qatty aıaz kezinde Temirtaýda magıstraldyq jylý qubyrynyń zaqymdanýynan eki shaǵynaýdandaǵy úıler jylýsyz qaldy.
Keshe keshki ýaqytta 8-shi jáne Otradnoe shaǵyn aýdandaryn jylýmen qamtamasyz etetin magıstraldyq jylý jelisinde apat boldy. Bul týraly aqparat áleýmettik jelilerde tarady.
Qubyrdyń jarylýynan shamamen 40 kópqabatty turǵyn úı, birneshe jeke turǵyn úı, sondaı-aq bıznes jáne áleýmettik nysandar jylýsyz qalǵan. Oqıǵa daýyldy kúni boldy, sol ýaqytta óńirde aýa temperatýrasy –30 gradýsqa deıin tómendegen.
Temirtaý qalasynyń ákimi Ǵalym Áshimovtiń aıtýynsha, zaqym tozyǵy jetken, 1970 jyldardan beri kúrdeli jóndeýden ótpegen qubyr ýchaskesinde anyqtaldy. Qalpyna keltirý jumystaryna mamandar men apattyq-qalpyna keltirý brıgadalary jumyldyryldy. Barlyq qajetti tehnıka men kúshter qoldanylyp, aqaýlardy joıý jumystary úzdiksiz júrgizilip keledi. Ákimdik jumystardyń barysy týraly qosymsha habarlaıtynyn jetkizdi.
Qala ákimdiginiń málimetinshe, búgin saǵat 10:00-degi jaǵdaı boıynsha aqaý tolyq joıylǵan. Qazirgi ýaqytta júıeni toltyrý jumystary júrgizilip, turǵyn úılerge jylý berý kezeń-kezeńimen qalpyna keltirilip jatyr.
Osyǵan deıin aqtaýlyqtar qaqaǵan qysta jylýdyń joqtyǵyna shaǵymdanǵany jaıly habarlaǵan bolatynbyz.