Temirtaýda 3,8 shaqyrym jylý jelisi jańǵyrtylyp jatyr
ASTANA. KAZINFORM - Temirtaýda GRES-1, JEO-2 jáne jylý jelileriniń qysqa daıyndyǵy tekserildi.
Energetıka mınıstrliginiń Memlekettik energetıkalyq qadaǵalaý jáne baqylaý komıteti tóraǵasynyń orynbasary Ernar Hasenov Temirtaýda energetıkalyq ınfraqurylymnyń negizgi nysandaryndaǵy jóndeý jumystarynyń barysymen jáne qalanyń 2026–2027 jyldardaǵy kúzgi-qysqy kezeńge daıyndyǵyn tekserdi. Temirtaý qalasyndaǵy GRES-1-de №10 qazandyq agregatyna kúrdeli jóndeý jumystary jalǵasyp jatyr.
Josparlanǵan jumystar aıaqtalǵannan keıin stantsııa jylytý maýsymyn úsh qazandyq jáne eki týrbına quramynda bastaý josparlanýda. «Qarmet» AQ-nyń JEO-2 stantsııasynda №2 qazandyq agregatyna kúrdeli jóndeý, al №1 qazandyq agregatyna keńeıtilgen aǵymdaǵy jóndeý júrgizilýde.
Jóndeý naýqanynyń qorytyndysy boıynsha stantsııanyń jylytý maýsymyn alty qazandyq jáne tórt týrbına quramynda ótkizýge daıyndyǵyn qamtamasyz etý josparlanyp otyr. Temirtaý qalasynyń jylý jelilerin daıyndaýǵa da erekshe nazar aýdaryldy. Kásiporyn basshylyǵy «Qaraǵandy oblysy, Temirtaý qalasy, Mıchýrın kóshesindegi VK «Mýka-Sahar» (Qaraǵandy kóshesi) nysanynan TP-34-ke deıingi TM №3 jylý jelilerin rekonstrýktsııalaý» jobasynyń iske asyrylýy týraly aqparat berdi. Bıyl joba aıasynda 3,8 shaqyrym jylý jelisin jańǵyrtý kózdelgen.
Búginde qubyrdyń shamamen 3 shaqyrymynyń montajy aıaqtaldy, qalǵan uzyndyǵy shamamen 800 metr ýchaskede jumys jalǵasyp jatyr. Jobany iske asyrý tutynýshylardy jylýmen qamtý senimdiligin arttyrýǵa, jylý shyǵynyn azaıtýǵa jáne qysqy kezeńdegi eń joǵary júktemeler kezinde jylý ınfraqurylymynyń turaqty jumysyn qamtamasyz etýge múmkindik beredi.
Inspektsııa qorytyndysy boıynsha Ernar Hasenov barlyq josparlanǵan jóndeý jumysyn belgilengen merzimde jáne oryndalatyn jumystardyń sapasyna qoıylatyn talaptardy saqtaı otyryp aıaqtaýdy tapsyrdy.
Negizgi jáne qosalqy jabdyqtardyń tehnıkalyq jaǵdaıyna, sondaı-aq jylý jelileriniń qysqy kezeńdegi eń joǵary júktemelerdi ótkerýge daıyndyǵyna erekshe nazar aýdarý usynyldy.
Aıta ketelik Qazaqstan jylý maýsymyna qanshalyqty daıyn ekendigi týraly jazǵan edik.
