Temirtaýda 185 mıllıon teńgege zańsyz tsıfrlyq aktıv óndirgen azamat sottaldy

TEMІRTAÝ. KAZINFORM – Qaraǵandy oblysy, Temirtaý qalasynda tsıfrlyq aktıvterdi zańsyz óndirý faktisi boıynsha sot úkimi shyǵaryldy. Bul týraly Qarjylyq monıtorıng agenttiginiń baspasóz qyzmeti habarlady. 

Tergeý Qarjy monıtorıngi agenttiginiń Qaraǵandy oblysy boıynsha departamentimen júrgizildi. 

E.G. Tolovov 2021 jylǵy tamyz aıynan bastap lıtsenzııasyz krıptoferma uıymdastyrǵan. Ol Reseıden 156 birlik maınıng jabdyǵyn satyp alyp, ony óndiristik bazasyna ornatqan. 

Tolovov óndirgen tsıfrlyq aktıvterdi krıptobırjadaǵy akkaýntynda jınap, keıin «BinancePool» jáne «Litecoinpool.org» maınıng pýldary arqyly satqan. Saýda P2P-aýdarymdar arqyly jáne USDT-ny teńgege aıyrbastaý jolymen júzege asqan.

Jalpy óndirilgen aktıvterdiń kólemi 11,2 BTC jáne 90,2 LTC, bul shamamen 185 mıllıon teńgege teń. 

Sot úkimi boıynsha oǵan 1 jylǵa bas bostandyǵynan aıyrý jáne barlyq maınıng jabdyǵyn tárkileý túrindegi jaza taǵaıyndaldy. Sonymen qatar memleket kirisine qylmystyq jolmen alynǵan 185 mıllıon teńge qaıtaryldy.

Sot sheshimi zańdy kúshine endi. 

Budan buryn Aqtóbede 3,5 mlrd teńgelik zańsyz krıptoaınalym áshkere bolǵanyn habarlaǵan edik.