Temirtaýda 1575 kamera arqyly táýlik boıy baqylaý júrgizetin ortalyq ashyldy
ASTANA. KAZINFORM – Temirtaý qalalyq prokýratýrasynyń bazasynda qaladaǵy jaǵdaıdy táýlik boıy baqylap, zań buzýshylyqtarǵa jedel den qoıýǵa múmkindik beretin Qadaǵalaý den qoıý ortalyǵy ashyldy, dep habarlaıdy Qaraǵandy oblysynyń prokýratýrasy.
Ortalyqtyń negizgi mindeti – prokýrorlyq qadaǵalaýdyń tıimdiligin arttyrý, zańdylyqtyń saqtalýyn baqylaýdy kúsheıtý, azamattardyń quqyqtary men memleket múddelerin qorǵaý úshin jedel sharalar qabyldaý.
Ortalyqtaǵy biryńǵaı beıneqabyrǵaǵa 1575 kamera qosylǵan. Olar qala kósheleri men saıabaqtarda, mektepterde, balabaqshalarda, medıtsınalyq mekemelerde jáne basqa da nysandarda ornatylǵan.
– Qadaǵalaý den qoıý ortalyǵy ýaqytsha ustaý ızolıatorlaryndaǵy azamattardyń quqyqtarynyń saqtalýyn da qashyqtan baqylaýǵa múmkindik beredi. Prokýrorlar zań buzýshylyqtardy oqıǵa ornyna barmaı-aq der kezinde anyqtap, tıisti shara qabyldaı alady. Ortalyq jumysynyń nátıjesinde zańsyz qamaýda otyrǵan segiz adam bosatyldy, – dep habarlady prokýratýra.
Ortalyq tsıfrlyq qadaǵalaý júıesimen de ıntegratsııalanǵan. Bul prokýratýranyń zań buzýshylyqtardy anyqtaý jáne olardyń aldyn alý múmkindikterin keńeıtedi.
Monıtorıngti kezekshi prokýrorlar táýlik boıy júrgizedi. Quqyq buzýshylyq nemese ózge de zań talaptarynyń buzylýy anyqtalǵan jaǵdaıda aqparat jedel óńdelip, qajetti sharalar qabyldanady.
Prokýratýra málimetinshe, qabyldanǵan sharalar Temirtaýdaǵy qylmys deńgeıin 28%-ǵa tómendetýge yqpal etken. Asa aýyr qylmystar sany 50%-ǵa, al kámeletke tolmaǵandar jasaǵan qylmystar 87%-ǵa azaıǵan.
Ortalyqtyń ashylýyna Bas prokýratýranyń Qarjy departamentiniń bastyǵy Іlııas Ispanov, qyzmet bastyǵynyń orynbasary Aqymjan Úmbitalın, Qaraǵandy oblysynyń prokýrory Murat Tileýberdıev jáne qalanyń memlekettik organdarynyń ókilderi qatysty.
Іs-sharaǵa qatysýshylar qadaǵalaý qyzmetine tsıfrlyq tehnologııalardy odan ári engizý zań buzýshylyqtarǵa den qoıý jedeldigin arttyryp, memlekettik organdar arasyndaǵy ózara is-qımyldy kúsheıtýge múmkindik beretinin atap ótti.
Aıta keteıik, Astanadaǵy bilim berý uıymdaryndaǵy 12 myńnan astam kamera jedel basqarý ortalyǵyna qosyldy.
