Temirtaý mańynda jol apatynan eki bala qaza tapty
TEMІRTAÝ. KAZINFORM — Temirtaý qalasyna jaqyn jerde eki kólik soqtyǵysty. Saldarynan eki bala qaza taýyp, 10 adam aýrýhanaǵa jetkizildi.
Oqıǵa saǵat 17:56-da bolǵan. Almaty-Ekaterınbýrg tas jolynda, Temirtaý qalasyna jaqyn jerde Toyota Camry jáne Chevrolet Nexia markaly eki kólik soqtyǵysyp, jol-kólik oqıǵasy boldy.
«Apat saldarynan Chevrolet Nexia kóliginiń eki jolaýshysy oqıǵa ornynda qaza tapty, eki kóliktegi on jolaýshy medıtsınalyq mekemege jetkizildi. Qaza tapqandardyń ekeýi de kámelettik jasqa tolmaǵan», - dep habarlady Qaraǵandy oblysy Polıtsııa departamentiniń baspasóz qyzmeti.
Atalǵan fakti boıynsha qylmystyq is qozǵaldy. Saraptama taǵaıyndaldy. Qazir tergeý amaldary júrgizilip, oqıǵanyń mán-jaıy anyqtalyp jatyr.
Polıtsııa departamenti taǵy da jol qozǵalysy erejelerin saqtaýǵa jáne belgilengen jyldamdyqty buzbaýǵa shaqyrady.