Temirtaý mańynda jylyjaıda ósirilgen 125 túp qarasora anyqtaldy
ASTANA. KAZINFORM – Qaraǵandy oblysynda polıtseıler úı jaǵdaıynda uıymdastyrylǵan esirtki plantatsııasynyń qyzmetin toqtatty. Temirtaý qalasynyń mańyndaǵy eldi mekenderdiń birinde arnaıy jabdyqtalǵan jylyjaıdan 125 túp qarasora tabyldy, dep habarlaıdy Polisia.kz.
Operatsııa «Qarasora – 2026» respýblıkalyq jedel-profılaktıkalyq is-sharasy aıasynda Temirtaý qalasy polıtsııa basqarmasynyń esirtki qylmysyna qarsy is-qımyl bóliminiń jáne Qaraǵandy men Ulytaý oblystary boıynsha Qylmystyq-atqarý júıesi departamenti qyzmetkerleriniń birlesken jumysynyń nátıjesinde júrgizildi.
– Jeke turǵyn úıdiń aýmaǵyn tekserý barysynda úı irgesindegi jer teliminen jáne arnaıy jabdyqtalǵan jylyjaıdan qarasora tektes esirtki quramdy 125 túp ósimdik anyqtaldy. Sonymen qatar tintý kezinde sharýashylyq qurylystarynyń birinen ósimdik tektes keptirilgen esirtki zattary men tirkelmegen ańshylyq myltyq tárkilendi. Aldyn ala málimetke sáıkes, kúdikti qarasorany arnaıy jasalǵan jaǵdaılarda ózdiginen ósirip kelgen, – dedi Qaraǵandy oblysy polıtsııa departamenti bastyǵynyń birinshi orynbasary Qýanysh Orynbetov.
Polıtsııa qyzmetkerleri 19 jastaǵy jergilikti turǵyndy ustady.
Atalǵan derek boıynsha Qazaqstan Respýblıkasy Qylmystyq kodeksiniń 300-babynyń 1-bóligi boıynsha, quramynda esirtki zattary bar, ósirýge tyıym salynǵan ósimdikterdi zańsyz ósirý faktisimen sotqa deıingi tergep-tekserý bastaldy.
Polıtsııa esirtki quramdy ósimdikterdi zańsyz ósirý qylmystyq jaýapkershilikke ákeletinin eske salyp, «Zań jáne tártip» qaǵıdaty aıasynda esirtkiniń zańsyz aınalymyna qarsy kúres jalǵasatynyn málimdedi.
Aıta keteıik, Qyzylordada 1900-ge jýyq túp qarasora ósirgen alty adam ustaldy.
