Temirtaý qalasynyń jastary jeńildetilgen ıpoteka ala alady
ASTANA. KAZINFORM – Temirtaýda jumys isteıtin jastarǵa turǵyn úı alý úshin jeńildetilgen nesıe berýge ótinishter qabyldaý bastaldy. Qujattardy qabyldaý 28 maýsymǵa deıin jalǵasady.
«Temirtaý jastary» turǵyn úı-ıpotekalyq baǵdarlamasy ótken jyly iske qosyldy. Bul Temirtaý qalasy ákimdigi men «Otbasy bankiniń» birlesken jobasy.
«Joba qalada keminde bir jyl turatyn jáne jumys isteıtin jas mamandardy qoldaýǵa baǵyttalǵan. Qatysýshylardyń jasy — 35 jasqa deıin. Mindetti túrde QR azamattyǵy jáne qaryz alýshynyń jáne onyń otbasy músheleriniń menshiginde jyljymaıtyn múlik bolmaýy (sońǵy 5 jyl ishinde) tıis», — delingen habarlamada.
Baǵdarlamaǵa Densaýlyq saqtaý, bilim berý, mádenıet, sport júıeleriniń qyzmetkerlerinen, BAQ, óndiris, JOO jáne áleýmettik sala ókilderinen basqa kvazımemlekettik sektordyń kommýnaldyq kásiporyndarynyń, TJM, jolaýshylar kólik kásiporyndarynyń, «Oqjetpes-T» jáne «Qazposhta» kompanııalarynyń qyzmetkerleri de qatysa alady.
«Qaryzdyń eń joǵary somasy 15 mln teńge. Úmitkerlerde qaryz somasynyń keminde 10% mólsherinde bastapqy jarnasy bolýy tıis. Bul rette turǵyn úıdi jyldyq 6%-ben resimdeýge bolady. Nesıe merzimi — 8 jyl», - dep túsindirdi ákimdiktiń baspasóz qyzmeti.
Turǵyn úıdi bastapqy jáne qaıtalama jyljymaıtyn múlik naryǵynda satyp alýǵa bolady.
Temirtaý qalasynyń ishki saıasat bóliminiń basshysy Gúlmıra Oljabaevanyń aıtýynsha, «Temirtaý jastary» jobasy 2023 jyly óziniń tıimdiligin kórsetken.
— Ótken jyly osy baǵdarlama boıynsha 517 mln teńgege jeńildikti nesıe berildi. 39 otbasy turǵyn úı satyp aldy. Bıyl soma ulǵaıdy, ıaǵnı óz páterlerin alatyn jas otbasylardyń sany da artady, — dep atap ótti ol.
Úmitkerler kelesi qujattardy usynýy kerek:
— jeke kýálik;
— azamattyq hal-ahýaldy memlekettik tirkeý týraly kýálik (neke qııý jáne balalardyń týýy týraly kýálik — bolǵan jaǵdaıda);
— ótinish berýshige jáne otbasynyń barlyq múshelerine jyljymaıtyn múliktiń joqtyǵy týraly anyqtama;
— resmı blankide jumys ornynan anyqtama (resmı blank bolmaǵan jaǵdaıda anyqtamada uıymnyń móri bolýy tıis);
— eńbek ótilin rastaıtyn qujat;
— eńbek qyzmetiniń barlyq kezeńi úshin zeınetaqy aýdarymdary týraly úzindi kóshirme;
— múgedektik týraly anyqtama (bar bolsa).
Qujattardy 28 maýsymǵa deıin Jastar resýrstyq ortalyǵyna myna meken-jaı boıynsha tapsyrý qajet: Qurylysshylar kóshesi, 47.
Anyqtama telefony: +7-747-515-27-77.
