Temirtaý qalasynyń ákimi bolyp Sapar Sataev taǵaıyndaldy
QARAǴANDY. KAZINFORM — Qazaqstan Respýblıkasy Prezıdenti Ákimshiliginiń jáne qalalyq máslıhat depýtattarynyń kelisimimen Temirtaý qalasynyń ákimi bolyp Sapar Sataev taǵaıyndaldy. Jańa basshyny Temirtaý qalasynyń aktıvine Qaraǵandy oblysynyń ákimi Ermaǵanbet Bólekpaev tanystyryp, qala basshysynyń aldyna qoıylǵan negizgi mindetterdi aıqyndap berdi.
— Sapar Sataevtyń memlekettik basqarý júıesinde tájirıbesi mol. Ol áleýmettik-ekonomıkalyq damý máselelerin jaqsy biledi ári qajetti kásibı biliktilikke ıe. Sonymen qatar Balqash qalasyndaǵy qyzmeti barysynda iri ónerkásip kásiporyndarymen tıimdi áriptestik ornata bildi. Bul tájirıbe Temirtaýda da qala quraýshy metallýrgııalyq kásiporynmen yntymaqtastyqty odan ári damytýǵa serpin beredi dep senemin. Onyń basshylyǵymen jylýmen jáne sýmen jabdyqtaý júıelerin jańǵyrtý, joldardy jóndeý baǵytynda aýqymdy jobalar júzege asyryldy. Sonyń nátıjesinde kommýnaldyq ınfraqurylymnyń senimdiligi edáýir artyp, kórsetiletin qyzmetterdiń sapasy jaqsardy. Sapar Qaıyrkenuly, sizdiń basty mindetińiz — temirtaýlyqtardyń ómir súrý sapasyn arttyrý, turǵyndar úshin jaıly ári qaýipsiz qalalyq orta qalyptastyrý, sondaı-aq qalanyń ornyqty áleýmettik-ekonomıkalyq damýyn qamtamasyz etý, — dedi oblys ákimi.
Sapar Sataev eńbek jolyn 2002 jyly «Qazaqavtojol» respýblıkalyq memlekettik kásipornynda bastaǵan. Ár jyldary «Botaqara sý qojalyǵy» kommýnaldyq memlekettik qazynalyq kásiporny dırektorynyń orynbasary jáne dırektordyń mindetin atqarýshy qyzmetterin atqarǵan.
Memlekettik qyzmette 2010 jyldan beri eńbek etip keledi. Qaraǵandy oblysy Buqar jyraý aýdanyndaǵy Botaqara kentiniń ákimi boldy.
2013–2015 jyldary Abaı qalasynyń ákimi qyzmetin atqardy. Keıin Buqar jyraý aýdany ákiminiń orynbasary bolyp jumys istedi. Odan soń Prıozersk qalasynyń ákimi boldy.
2023 jyldyń mamyr aıynan bastap jańa qyzmetke taǵaıyndalǵanǵa deıin Balqash qalasynyń ákimi qyzmetin atqardy.
Óz kezeginde Sapar Sataev búginde Temirtaýdyń tynys-tirshiligin jaqsy biletinin, qandaı máseleler erekshe nazar aýdarýdy qajet etetinin jáne turǵyndardyń qandaı sheshimderdi kútip otyrǵanyn atap ótti.
— Temirtaý qashanda adal eńbek, jaýapkershilik pen naqty nátıjeni baǵalaıtyn qala. Meniń jumysym da dál osy qaǵıdattarǵa negizdeletin bolady, — dep atap ótti Sapar Sataev.
Aıta ketelik Temirtaý ákimi qyzmetimen qoshtasyp, turǵyndarǵa úndeý jasaǵan edi.
