Temirtaý baǵyty boıynsha artyq salmaqpen júretin júk kólikteriniń sany artty

ASTANA. KAZINFORM — Avtojolda salmaq normalaryn buzǵandar sany 33%-ǵa jetti, dep habarlaıdy «QazAvtoJol» UK.

2025 jyldyń basynan bastap «Astana-Temirtaý» respýblıkalyq mańyzy bar avtojolynynyń 1305 shaqyrymynda ornatylǵan avtomattandyrylǵan ólsheý stantsııalary 131 454 júk kóliginiń júrip ótkenin tirkedi. Onyń ishinde 43 445 kólik quraly (shamamen 33%) ruqsat etilgen salmaq normasynan artyq júkpen júrgen. Ereje buzýshylardyń tıegen artyq júkteriniń salmaǵy 5 tonnadan asyp otyr.

AÓS kólik quraldarynyń negizgi sıpattamalaryn: salmaǵyn, ólshemderin, memlekettik tirkeý nómirin, markasyn jáne óster arasyndaǵy qashyqtyqty avtomatty túrde tirkeıdi. Osy derekterdiń negizinde ýákiletti organ ruqsat etiletin shekti salmaq parametrlerin buzǵan qólik quraldaryn anyqtaıdy.

— QR Investıtsııalar jáne damý mınıstriniń 2015 jylǵy 26 naýryzdaǵy № 342 buıryǵyna sáıkes ruqsat etilgen óstik júkteme 10 tonnany quraıdy. Osylaısha, úsh ósti kólikter úshin ruqsat etilgen massa 30 tonnadan aspaýy kerek, tórt ósti kólikter úshin — 40 tonna jáne ary qaraı ós sanyna baılanysty arta beredi. Ruqsat etilgen salmaqtan asyp ketken kólikterdiń úlesi artyp otyrǵany alańdatýshylyq týdyrady. Sebebi, júıeli túrde shamadan tys júkteme jol jamylǵysynyń jaǵdaıyna teris áser etip, onyń paıdalaný merzimin aıtarlyqtaı qysqartady jáne qalpyna keltirý shyǵyndaryn arttyrady, — delingen kompanııa taratqan aqparatta.

Esterińizge sala keteıik, Qazaqstan Respýblıkasynyń Ákimshilik quqyq buzýshylyq týraly kodeksiniń 571-babyna sáıkes salmaq parametrlerinen asyp ketkeni úshin buzýshynyń sanatyna jáne belgilengen normatıvterden asyp ketý dárejesine baılanysty 40-tan 1000 AEK-ke deıin aıyppul qarastyrylǵan.

Budan buryn joldaǵy avtokólikterdiń salmaǵyn ólsheıtin stantsııalarǵa beınekamera ornatylatynyn jazǵan edik.