Temirtaý ákimi qyzmetimen qoshtasyp, turǵyndarǵa úndeý jasady
ASTANA. KAZINFORM – Temirtaý qalasynyń ákimi Ǵalym Áshimov qala turǵyndaryna úndeý jarııalap, ákim qyzmetindegi jumysyn aıaqtaǵanyn málimdedi.
– Búgin Temirtaý qalasynyń ákimi retindegi jumysymdy aıaqtap otyrmyn. Árbir temirtaýlyqqa beıjaı qaramaǵany, belsendi azamattyq ustanymy jáne ashyq dıalogy úshin erekshe alǵysymdy bildiremin. Osyndaı ashyq qarym-qatynas naqty máselelerdi kórip, olardy birlesip sheshý joldaryn izdeýge múmkindik berdi, – dep jazdy Ǵalym Áshimov.
Ol Temirtaý qalasy men onyń turǵyndaryna qyzmet etýdi úlken mártebe sanaıtynyn atap ótti.
– Alda qandaı qyzmetter kútip tursa da, júregimniń bir bólshegi – metallýrgter qalasynda, qaısar jandar men erekshe minezdiń mekeni bolǵan Temirtaýda qalady. Temirtaýdyń ıgiligi jolynda birge eńbek etip, qalanyń damýyna óz úlesin qosqan barsha azamattarǵa shynaıy alǵysymdy bildiremin, – dedi ol.
Sondaı-aq Ǵalym Áshimov Temirtaý qalasyna beıbitshilik, turaqtylyq, ósip-órkendeý jáne jańa jetistikter tilep, turǵyndarǵa ózine kórsetken senimi men qoldaýy úshin rızashylyǵyn jetkizdi.
Aıta keteıik, Dastan Ryspekov Ulytaý oblysynyń ákimi qyzmetinen bosatyldy.
