Temirlan Anarbekovtiń seıvi Chempıondar lıgasy negizgi kezeńindegi úzdik ondyqqa endi
ASTANA. KAZINFORM — UEFA-nyń Instagram paraqshasyndaǵy resmı akkaýnty Chempıondar lıgasy negizgi kezeńindegi qaqpashylardyń úzdik on seıviniń tizimin jarııalady.
Bul tizimde qazaqstandyq «Qaırat» komandasynyń qaqpashysy Temirlan Anarbekov te bar. Onyń Danııanyń «Kopengagen» klýbyna qarsy kezdesýdegi seıvi mamandar tarapynan joǵary baǵalandy. Sol sátte ol qaqpanyń alys buryshyna baǵyttalǵan soqqyǵa toıtarys berdi.
Temirlan Atyraýda 2003 jyly 14 qarashada dúnıege kelgen. 2017 jylǵy qarashadan bastap ol «Qaırat» akademııasynyń tárbıelenýshisi atandy.
2020 jyly nebári 17 jasynda Anarbekov Premer-lıgadaǵy alǵashqy oıynyn «Tarazǵa» qarsy ótkizdi.
2022 jyly ol Birinshi lıgada oınaıtyn «Qaırat-Jastar» komandasynyń kapıtany boldy. Al 2024 jylǵy maýsymda astanalyq «Jeńiste» jalǵa oınap, komandamen birge Lıga kýbogynyń fınalyna deıin jetti.
Aıta ketsek, negizgi kezeńde «Qaırat» Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2, Grekııanyń «Olımpıakosyna» 0:1, Danııanyń «Kopengagenine» 2:3, Belgııanyń «Brıýggesiine» 1:4, Anglııanyń «Arsenalyna» 2:3 esebimen jol berse, Kıprdiń «Pafosymen» 0:0 esebimen teń tústi.
Sonymen qatar, UEFA Chempıondar lıgasynyń jalpy kezeńine qatysýshy komandalardyń qaqpashylary jasaǵan seıvter sany boıynsha jarııalanǵan statıstıkalyq derekterge sáıkes ol kóshbasshylar qataryna endi.
Atalǵan týrnırdiń segiz týrynan keıin Temirlan Anarbekovtiń enshisine 36 seıv jazylǵan, bul — barlyq qatysýshy komanda qaqpashylary arasyndaǵy úshinshi kórsetkish.
