Temirlan Anarbekov UEFA Chempıondar lıgasynyń úzdik qaqpashylary qataryna endi

ASTANA. KAZINFORM - Almatylyq «Qaırat» qaqpashysy Temirlan Anarbekov UEFA Chempıondar lıgasy 2025/26 jylǵy maýsymynyń negizgi kezeńindegi úzdik qaqpashylar tizimine engizildi.

UEFA Chempıondar lıgasynyń jalpy kezeńine qatysýshy komandalardyń qaqpashylary jasaǵan seıvter sany boıynsha jarııalanǵan statıstıkalyq derekterge sáıkes ol kóshbasshylar qataryna endi.

Atalǵan týrnırdiń segiz týrynan keıin Temirlan Anarbekovtiń enshisine 36 seıv jazylǵan, bul - barlyq qatysýshy komanda qaqpashylary arasyndaǵy úshinshi kórsetkish.

Reıtıngtiń kósh basynda norvegııalyq «Bodo Glımt» klýbynyń reseılik qaqpashysy Nıkıta Haıkın tur, ol qaqpaǵa baǵyttalǵan 49 soqqyny qaıtarǵan. Ekinshi orynda ıspanııalyq «Real Madrıd» klýbynyń belgııalyq qaqpashysy Tıbo Kýrtýa (41 seıv) jaıǵasty.

Al Temirlan Anarbekovten tómen frantsııalyq «Marsel Olımpık» komandasynyń argentınalyq qaqpashysy Hıronımo Rýllı (ol da 36 seıv), chehııalyq «Slavııanyń» qaqpashysy Iındrjıh Stanek (34 seıv) keledi.

UEFA Chempıondar lıgasy negizgi kezeńiniń alǵashqy eki týrynda «Qaırat» qaqpashysy Sherhan Qalmurza 11 seıv jasap úlgerdi.

Aıta ketsek, negizgi kezeńde «Qaırat» Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2, Grekııanyń «Olımpıakosyna» 0:1, Danııanyń «Kopengagenine» 2:3, Belgııanyń «Brıýggesiine» 1:4, Anglııanyń «Arsenalyna» 2:3 esebimen jol berse, Kıprdiń «Pafosymen» 0:0 esebimen teń tústi.

Eske salsaq, budan buryn Temirlan Anarbekov Chempıondar lıgasyndaǵy úzdik 20 fýtbolshynyń tizimine endi.