Temirlan Anarbekov UEFA Chempıondar lıgasynda keremet kórsetkishke qol jetkizdi

ASTANA. KAZINFORM - Almatylyq «Qaırat» komandasynyń qaqpashysy Temirlan Anarbekov UEFA Chempıondar lıgasyndaǵy úzdik oıynyn jalǵastyryp, sport mamandarynyń joǵary baǵasyn aldy. 

Astanada ótken «Qaırat» pen «Olımpıakos» komandalary arasyndaǵy kezdesýde ol UEFA tarapynan belgilengen kezdesýdiń úzdik oıynshysy (MVP) ataǵyna ıe boldy. Qaqpashynyń sheberligi 9,2 ballǵa baǵalandy. Kezdesý barysynda Temirlan 8 seıv jasady.

Aıta ketsek, Temirlan Anarbekov — elimizdiń atynan Chempıondar lıgasynyń úzdik oıynshysyna beriletin MVP ataǵyn jeńip alǵan alǵashqy fýtbolshy.

Kezdesý barysynda qazaqstandyq qaqpashy Chempıondar lıgasynyń jalpy kezeńinde 26 seıv jasady. Ol bul kórsetkish boıynsha Nıkıta Haıkın («Býda-Glımt», 31 seıv) jáne Djeronımo Rýlıden («Marsel», 29 seıv) keıingi orynda tur. Grekııalyq komandamen oıynnan keıin Temirlan «Real Madrıd» qaqpashysy Tıbo Kýrtýany (22 seıv) jáne «Bavarııa» qaqpashysy Manýel Noıerdi (19 seıv) artta qaldyrdy.

Sondaı-aq UEFA tarapynan qazaqstandyq qaqpashynyń eki seıvi úzdik dep baǵalandy. Atap aıtar bolsaq, Chempıondar lıgasynyń alǵashqy kúninde ótken 9 kezdesýde úzdik sanalǵan 8 seıvtiń qataryna endi. 

UEFA Anarbekovten ózge bul tizimge «Sportıng» sapynan Rýı Sılva, «Slavııa» qaqpashysy Iındrjıh Stanek, «Marsel» quramynan Heronımo Rýlıdiń seıvterin engizdi.

Eske salsaq, «Qaırat» komandasy UEFA Chempıondar lıgasynyń altynshy týrynda «Olımpıakosqa» 0:1 esebimen ese jiberdi.