Temirlan Anarbekov te bilim granty ıegeri atandy

ASTANA. KAZINFORM – Búgin Ǵylym jáne joǵary bilim mınıstrliginde Sport jáne týrızm akademııasynyń rektorlyq granty fýtbol klýby «Qaırattyń» qaqpashysy ári ekinshi kýrs stýdenti Sherhan Qalmyrzaǵa tabystaldy.

Aıta keterligi, fýtbol — komandalyq oıyn, al jeńis árqashan birlesken eńbektiń nátıjesi. Osy oraıda, Ǵylym jáne joǵary bilim mınıstri Saıasat Nurbek mınıstrlik «Qaırat» klýbynyń barlyq stýdent-sportshysyn qoldaıtynyn erekshe atap ótti.

Buǵan deıin mınıstrlik Temirlan Anarbekovke (ol úsh penaltıdi qaıtardy) jáne Dastan Satpaevqa Alǵys hat tabystaǵan bolatyn.

– Bul jigitter «Qaırat» komandasynyń Chempıondar lıgasynyń toptyq kezeńine shyǵýy úshin bar kúsh-jigerin saldy. Ókinishke qaraı, aldaǵy oıyndarǵa daıyndyqqa baılanysty marapatqa tek Sherhan Qalmyrza ǵana qatysa aldy. Qýana habarlaımyn: biz Temirlan Anarbekovti 2026 jyldyń qańtarynan bastap Qazaq sport jáne týrızm akademııasynyń stýdenti bolýǵa shaqyrdyq. Sondaı-aq, Dastan Satpaevtyń da bizdiń joǵary oqý oryndarynyń birine túsetinine úmittimiz. Onyń jasy bar bolǵany 17-de! Mınıstrlik sportty damytýmen qatar, kásibı sportshylardyń akademııalyq bilim alýyna da erekshe mán beredi. 

Temirlan Anarbekov pen Sherhan Qalmyrza – sporttyq jetistikteri úshin grant ıegeri atanǵan alǵashqy sportshylar emes. Buǵan deıin de kóptegen daryndy jastar osyndaı qoldaýǵa ıe bolǵan. Biz talantty jastardy barynsha qoldaýǵa tıispiz – meıli ol sportta, ǵylymda nemese ónerde bolsyn. Temirlan men Sherhannyń úlgisi kóptegen stýdentke oqý men sportty qatar alyp júrýge, maqsatqa jetýdiń eńbeksiz bolmaıtynyn dáleldeýge shabyt beredi. Sportshylarymyzǵa jeńis pen jarqyn jetistikter tileımin! – dedi mınıstr.