Temirlan Anarbekov «Qaırat» pen «Arsenal» kezdesýiniń mańyzyn atap ótti

ASTANA. KAZINFORM — «Qaırat» komandasynyń qaqpashysy Temirlan Anarbekov UEFA Chempıondar lıgasy negizgi kezeńi segizinshi týryndaǵy Anglııanyń «Arsenal» (London) kezdesýi jaıynda pikirin bildirdi.

Kezdesý 28 qańtardan 29-na qaraǵan túni saǵat 1:00–de Anglııa astanasy London qalasyndaǵy «Emıreıts» stadıonynda bastalyp, «Qazaqstan» telearnasynan tikeleı efırde kórsetiledi.

— Oıyn aldynda alǵan áserimiz erekshe. Bir jyldaı buryn mundaı deńgeıde kezdesý ótkizemiz dep oılaǵan joqpyz. Aldaǵy kezdesýde biz tolyqtaı daıyndyǵymyzdy kórsetemiz. Qandaı komandamen oınasaq ta, biz óz kúshimizdi kórsetemiz, — dedi Temirlan Anarbekov.

Aıta ketsek, Temirlan Anarbekov Chempıondar lıgasyndaǵy úzdik 20 fýtbolshynyń tizimine endi. Temirlan Anarbekovtiń bul reıtıngige qosylýy álemdik fýtbol úshin basty sensatsııa retinde baǵalanyp otyr. Ol Qazaqstan úshin úlken maqtanysh nysanyna aınaldy. Bul tizimde Kılıan Mbappe («Real Madrıd»), Erlıng Holand («Manchester Sıtı»), Garrı Keın («Bavarııa») syndy tanymal oıynshylar bar.

Temirlan Atyraýda 2003 jyly 14 qarashada dúnıege kelgen. 2017 jylǵy qarashadan bastap ol «Qaırat» akademııasynyń tárbıelenýshisi atandy.

2020 jyly nebári 17 jasynda Anarbekov Premer-lıgadaǵy alǵashqy oıynyn «Tarazǵa» qarsy ótkizdi. 

2022 jyly ol Birinshi lıgada oınaıtyn «Qaırat-Jastar» komandasynyń kapıtany boldy. Al 2024 jylǵy maýsymda astanalyq «Jeńiste» jalǵa oınap, komandamen birge Lıga kýbogynyń fınalyna deıin jetti.

Osyǵan deıin negizgi kezeńde «Qaırat» Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2, Grekııanyń «Olımpıakosyna» 0:1, Danııanyń «Kopengagenine» 2:3, Belgııanyń «Brıýggesiine» 1:4 esebimen jol berse, Kıprdiń «Pafosymen» 0:0 esebimen teń tústi.