Temirlan Anarbekov fýtbol reıtınginde kósh bastady

ASTANA. KAZINFORM - Almatylyq «Qaırat» komandasynyń qaqpashysy Temirlan Anarbekov Sofascore statıstıkalyq portalynyń nusqasy boıynsha reıtıngide kósh bastady.

Qazir Sofascore reıtınginde UEFA Chempıondar lıgasynyń bıylǵy maýsymynda oıyn kórsetip jatqan tek tórt fýtbolshy ǵana 8.00 jáne odan joǵary ball jınaı alǵan. Bul tizimde tanymal fýtbolshylardy artta qaldyrǵan Temirlan Anarbekov kósh bastap keledi.

Otandasymyz 8.90 ball jınasa, odan keıingi oryndardaǵy Kılıan Mbappe («Real Madrıd») - 8.34, Vıktor Osımhen («Galatasaraı») - 8.33, Nıkıta Haıkın («Býde-Glımt») - 8.10 ball jınaǵan. 

Aıta ketsek, Temirlan Anarbekov UEFA Chempıondar lıgasyndaǵy úzdik oıynyn jalǵastyryp, sport mamandarynyń joǵary baǵasyn aldy. 

Astanada ótken «Qaırat» pen «Olımpıakos» komandalary arasyndaǵy kezdesýde ol UEFA tarapynan belgilengen kezdesýdiń úzdik oıynshysy (MVP) ataǵyna ıe boldy. Qaqpashynyń sheberligi 9,2 balǵa baǵalandy. Kezdesý barysynda Temirlan 8 seıv jasady.

Aıta ketsek, Temirlan Anarbekov — elimizdiń atynan Chempıondar lıgasynyń úzdik oıynshysyna beriletin MVP ataǵyn jeńip alǵan alǵashqy fýtbolshy.
Sondaı-aq UEFA tarapynan qazaqstandyq qaqpashynyń eki seıvi úzdik dep baǵalandy. Atap aıtar bolsaq, Chempıondar lıgasynyń alǵashqy kúninde ótken 9 kezdesýde úzdik sanalǵan 8 seıvtiń qataryna endi.