Temirlan Anarbekov Chempıondar lıgasyndaǵy úzdik 20 fýtbolshynyń tizimine endi
ASTANA. KAZINFORM – Qazaqstandyq «Qaırat» komandasynyń qaqpashysy Temirlan Anarbekov UEFA Chempıondar lıgasy Instagram paraqshasynda jarııalanǵan 2025/2026 maýsymy jalpy kezeńiniń nátıjesi boıynsha úzdik 20 fýtbolshynyń tizimine engizildi.
Temirlan Anarbekovtiń bul reıtıngige qosylýy álemdik fýtbol úshin basty sensatsııa retinde baǵalanyp otyr. Ol Qazaqstan úshin úlken maqtanysh nysanyna aınaldy.
Bul tizimde Kılıan Mbappe («Real Madrıd»), Erlıng Holand («Manchester Sıtı»), Garrı Keın («Bavarııa») syndy tanymal oıynshylar bar.
Temirlan Atyraýda 2003 jyly 14 qarashada dúnıege kelgen. 2017 jylǵy qarashadan bastap ol «Qaırat» akademııasynyń tárbıelenýshisi atandy.
2020 jyly nebári 17 jasynda Anarbekov Premer-lıgadaǵy alǵashqy oıynyn «Tarazǵa» qarsy ótkizdi.
2022 jyly ol Birinshi lıgada oınaıtyn «Qaırat-Jastar» komandasynyń kapıtany boldy. Al 2024 jylǵy maýsymda astanalyq «Jeńiste» jalǵa oınap, komandamen birge Lıga kýbogynyń fınalyna deıin jetti.
Ótken jaz mezgili qazaqstandyq jankúıerler úshin erekshe este qaldy. UEFA Chempıondar lıgasynyń pleı-off kezeńindegi «Seltıkke» qarsy matchta (0:0) ol penaltı serııasynda úsh soqqyny qaıtaryp, «Qaıratty» alǵash ret Eýropanyń elıtalyq kezeńine alyp shyqty.
Aıta ketsek, Temirlan Anarbekov – elimizdiń atynan Chempıondar lıgasynyń úzdik oıynshysyna beriletin MVP ataǵyn jeńip alǵan alǵashqy fýtbolshy.
Sondaı-aq UEFA tarapynan qazaqstandyq qaqpashynyń eki seıvi úzdik dep baǵalandy.
Aıta ketsek, Temirlan Anarbekov «Qaıratpen» kelisimshart merzimin uzartty. Jańa kelisim 2028 jyldyń 30 qarashaǵa deıin eseptelgen.