Temirlan Anarbekov bolashaqta «Interdiń» qaqpasyn qorǵaýǵa laıyq — ıtalııalyq sarapshy

ASTANA. KAZINFORM – Almatylyq «Qaırat» fýtbol klýby Chempıondar lıgasyndaǵy kezekti oıynynda Eýropany tańǵaldyrdy. Komanda Mılanda ótken kezdesýde jergilikti «Interden» nebári bir dop aıyrmasymen jeńildi, dep habarlaıdy Sports.kz.

Match barysynda Qazaqstan fýtbolshysy birinshi taımnyń sońynda ǵana gol ótkizip alǵan. Al ekinshi taımda esepti teńestirip, ótken maýsymnyń fınalısi sanalatyn qarsylasyna aıtarlyqtaı qarsylyq kórsetti.

Italııalyq CalcioNews24.com saıtynyń reporteri Paýlo Kamedda oıynǵa qatysty pikirin bildirip, qazaqstandyq qaqpashy Temirlan Anarbekovtiń sheber oıynyn erekshe atap ótti.

— Matchqa deıin «Qaırat» bir ǵana dop aıyrmasymen utylýy múmkin dep eshkim oılamady. Óz basym da bulaı bolaryn kútpedim. «Inter» óz alańynda, jankúıerleriniń qoldaýymen oınady, sondyqtan jeńis tórt gol aıyrmasymen bolar dep oıladym. Biraq nátıje múlde basqa boldy. Mılandyqtarǵa bul jeńis ońaı tıgen joq. «Qaırat» qorǵanysqa jabysyp qalmaı, shabýylǵa da shyǵyp otyrdy. «Inter» jeńis úshin bar kúshin salýǵa májbúr boldy, — dedi Kamedda.

Onyń aıtýynsha, «Inter» qazaqstandyq komandany mensinbeı oınady deý durys emes.

— Mundaı deńgeıde qarsylasqa nemquraıly qaraý múmkin emes. Iá, olar bastapqyda ońaı jeńis bolady dep oılaǵan shyǵar, biraq alǵashqy taımnan keıin bári ózgerdi, — dedi sarapshy.

Italııalyq maman, ásirese qaqpashy Temirlan Anarbekovtiń oıynyn joǵary baǵalady.

— Menińshe, ol «Seltıkke» qarsy oıynda «Qaırattyń» toptyq kezeńge ótýine úlken úles qosty. Keıin jaraqat alyp, alǵashqy eki týrda oınaǵan joq. Al «Pafos» jáne «Intermen» matchtarda ol naǵyz top-deńgeıli qaqpashy ekenin dáleldedi. Eger osylaı jalǵastyra berse, bolashaqta «Interdiń» qaqpasyn qorǵaýǵa laıyq. Sondaı-aq 17 jastaǵy Dastan Sátpaevty da atap ótkim keledi, ony «Chelsı» der kezinde satyp aldy, óte daryndy jas, — dedi Kamedda.

Sarapshynyń pikirinshe, «Qaırat» aldaǵy oıyndarda da jaqsy nátıje kórsete alady.

— Bul — naǵyz bapkerdiń komandasy. Ýrazbahtın Eýropaǵa beımálim fýtbolshylardan kúresker ujym jasaı aldy. Eger «Qaırat» «Kopengagen» men «Olımpıakospen» dál osylaı oınasa, jeńis te uzaq kúttirmeıdi, — dep túıindedi ıtalııalyq jýrnalıst.

Aıta keteıik, Temirlan Anarbekov bilim granty ıegeri atandy.