Temirjol vokzaldaryn jóndeý jumystary kesheýildegen óńirler belgili boldy
ASTANA. KAZINFORM – Keıbir óńirler temirjol vokzaldaryn jóndeý jumystaryn kesheýildetip jatyr. Bul týraly Úkimet otyrysynda Kólik vıtse-mınıstri Maqsat Qalıaqparov aıtty.
— Sizdiń tapsyrmańyzdyń aıasynda aımaqtardy aralap, temirjol vokzaldaryn jóndeý boıynsha jumystardy zerdelep kórdik. Jobanyń tapsyrys berýshisi — «Qazaqstan temir joly» Ulttyq kompanııasy» AQ. Merdiger uıymdar jergilikti atqarýshy organdar tarapynan usynylǵan. Olarǵa 30 paıyz kóleminde avanstyq tólem jasalyndy. Qazirgi ýaqytta, 100 nysan boıynsha jobalyq-smetalyq qujattama memlekettik saraptamadan ótýde. Qys mezgiline daıyndyq qamtamasyz etilgen. Jolaýshylarǵa arnalǵan ýaqytsha qurylystar men kútý aımaqtary daıyn. 124 nysannyń 121-inde qurylys-montaj jumystary júrgizilýde. 3 vokzal boıynsha tarıhı-mádenı mura nysandary retinde ǵylymı zertteýler jalǵasýda. Bul nysandarda jóndeý 2026 jyly júrgiziletin bolady, — dedi vıtse-mınıstr.
Onyń málimetinshe, vokzaldardyń shamamen 70 paıyzy 30 jyldan astam ýaqyt jóndeýden ótpegen. Tehnıkalyq tekserýler nátıjesinde keıbir tireýish baǵandar men konstrýktsııalarda ári qaraı paıdalanýǵa jaramsyz aqaýlar anyqtalǵan.
— Osyǵan baılanysty 42 nysan tolyqtaı buzyldy. Bul óz kezeginde jumys kólemin arttyrýǵa jáne qurylys-montaj jumystarynyń bastalý merzimin keshiktirilýine yqpal etti. Almaty, Soltústik Qazaqstan, Batys Qazaqstan, Qaraǵandy, Qostanaı jáne Pavlodar oblystarynda jumystardyń oryndalýy 50 paıyzdan joǵary.Ortasha qurylys qarqyny Qyzylorda, Jambyl, Atyraý, Túrkistan jáne Shyǵys Qazaqstan oblystarynda baıqalady. Keıbir vokzaldarda qurylys qarqyny tómen, oryndalý deńgeıi 30 paıyzǵa deıin. Artta qalý sebepteri — jumys frontynyń ýaqytyly berilmeýi, tehnıkalyq tapsyrmalardyń «QTJ» tarapynan keshiktirilýi jáne merdiger uıymdar resýrstarynyń jetkiliksizdigi, — dedi Maqsat Qalıaqparov.
Vıtse-mınıstr jalpy joba ilgerilep kele jatqanyn aıtady.
— Barlyq máseleler sheshimin tabýda. Bıyl 80-nen astam vokzal paıdalanýǵa beriledi. Jergilikti atqarýshy organdar men merdiger uıymdardyń qurylys-montaj jumystarynyń qarqynyn kúsheıtýi qajet, — dedi ol.
Osy oraıda Premer-mınıstr Oljas Bektenov «Almaty-1» vokzalyn jańǵyrtý jumystary tym uzaqqa sozylyp ketkenin nazar aýdardy.