Temir jol salasynda 3,5 myńnan asa qyz-kelinshek eńbek etedi
ASTANA. KAZINFORM – Qazir «Jolaýshylar tasymaly» AQ-da jalpy 3,5 myńnan astam názik jandylar qyzmet etedi. Olardyń ishinde temirjol salasynyń bet-beınesi men jolaýshylardy alǵash qarsy alatyn myńǵa jýyq poıyz jolserigi men 400 kassa qyzmetkeri bar. Bul týraly «Jolaýshylar tasymaly» AQ baspasóz qyzmeti málim etti.
«Jolserik áıelder aıyna 170-ten 180 saǵatqa deıin jolda júredi. Olar otbasynan shalǵaı jerde júrip qyzmet etedi. Jolserik áıelderdiń poıyzda atqaratyn qyzmeti erekshe, sebebi jolaýshylarǵa qyzmet kórsetý men jyljymaly quramnyń jumysyn qamtamasyz etý úlken eńbek. Óziniń eńbek jolynda jolserik áıelder negizigi atqaratyn fýnktsıonalynan bólek, keıde psıholog ta, bala kútýshi de, medbıke de bolyp, boıyna barlyq qasıetti qatar alyp júrýi qajet. Ár túrli ómirlik jaǵdaılarda tipti akýsher de bolyp, jolaýshylardyń ómirine ǵana emes, jańa týǵan sábıdiń ómirine jaýapkershilik alady» - delingen habarlamada.
Ulttyq tasymaldaý kompanııasynyń baspasóz qyzmeti bergen málimetke sensek, sońǵy úsh jylda jolaýshylar poıyzynda 12 sábı dúnıege kelgen. Osy jaǵdaıdyń árqaısysynda sábıdi bosandyryp alǵan jolserik áıelder ózderi de kóp balaly ana ekendigin erekshe atap ótken jón.
«Kassa qyzmetkerleri de temirjol salasynda mańyzdy ról atqarady. Olar bıletterdi satýdy júzege asyryp qana qoımaı, sonymen qatar jolaýshylarǵa poıyzdardyń júrý kestesi men poıyzǵa qatysty basqa da qajetti aqparatty beredi. Elimiz boıynsha 24/7 rejıminde 165 vokzal kassasy jumys isteıdi. Kassalardyń úzdiksiz jumysy názik jandylardyń eki aýysymdyq eńbeginiń arqasynda múmkin bolyp otyr» - dep habarlady kompanııanyń baspasóz qyzmeti.
Jolserik áıelder otbasylarymen ótkizetin eń jarqyn sátin tárk etip, eńbek jolynyń teń jartysyn jolda ótkizedi. Temirjolshylardyń kúshi, eńbegi men óz isine degen adaldyǵy Ulttyq tasymaldaýshynyń tabysty qyzmetiniń ózegi.
