Temir tordyń arǵy jaǵyndaǵy qylmys: Semeıdegi tutqynǵa jańa úkim shyqty

ASTANA. KAZINFORM — Semeıde sot kolonııadan ekstremıstik materıaldardy tikeleı taratqan tutqyndy 10 jylǵa bas bostandyǵynan aıyrdy.

Sot talqylaýy barysynda anyqtalǵandaı, Semeı qalasyndaǵy qylmystyq-atqarý júıesi mekemesinde otyrǵan er adam WhatsApp jáne Telegram messendjerleri arqyly radıkalızm ıdeologııasyn jáne zorlyq-zombylyqty aqtaıtyn beınejazbalar men mátinderdi taratqan.

— Sottalýshy B.L.-ǵa qarýly jıhadqa shaqyrýlar men ózge din ókilderine qarsy óshpendilik sózder aıtylǵan dinı-ekstremıstik sıpattaǵy materıaldardy jiberip otyrǵan. Saraptamalarda terrorızmdi nasıhattaý jáne dinı alaýyzdyq belgileri bar ekeni rastaldy, — dep habarlady Abaı oblystyq sotynyń baspasóz qyzmeti.

Sot er adamnyń áreketterin QR Qylmystyq kodeksiniń 256-baby boıynsha buqaralyq aqparat quraldaryn jáne telekommýnıkatsııa jelilerin paıdalana otyryp terrorızmdi nasıhattaý dep tanydy.

— Qylmystyń sıpatyn, qylmystyń qaıtalaný sıpatyn jáne joǵary qoǵamdyq qaýiptiligin eskere otyryp, sot ony 9 jylǵa bas bostandyǵynan aıyrý jazasyn qatań rejımdegi kolonııada óteýge úkim etti, — dep atap ótti sot.

Aldyńǵy úkim boıynsha ótelmegen merzimniń bir bóligi qosylyp, túpkilikti jaza 10 jyl bas bostandyǵynan aıyrý bolyp belgilendi. Úkim áli zańdy kúshine engen joq.

Eske salaıyq, budan buryn Ulytaý oblysynda terrorızmdi nasıhattaǵan turǵyn 5 jylǵa sottaldy.