Temirjolshylar sý tasý qaýpi bar aımaqtarda táýlik boıy kezekshilikte júr -QTJ
ASTANA. QazAqparat - «Qazaqstan temir joly» UK» AQ (QTJ) Magıstraldyq jeli qyzmeti jol sharýashylyǵynyń barlyq bólimsheleri qar tazalaý jáne arshý tehnıkalary kóktemgi sel tasqyny júrýi múmkin tustarǵa shoǵyrlandyryldy, dep habarlady ulttyq kompanııanyń baspasóz qyzmeti.
«Elimizdegi barlyq sý basý qaýpi bar temirjol nysandarynyń boıynda jaýapty adamdardyń táýlik boıǵy kezekshiligi qamtamasyz etilgen. Barlyq temirjol bólimshelerinde magıstraldyq jeli men jasandy ǵımarattardyń qalypty jumys jasaýyna qajetti alǵysharttar jasaldy. Kóktemgi qyzyl sý ótetin tustardaǵy qaýipti oryndar, sý shaıyp ketýi múmkin topyraq qabaty, temirjoldyń shyǵa beristeri, buryn búlingen mekenderde barynsha qyraǵy kúzet ornatyldy»,-delingen kompanııa taratqan habarlamada.
«QTJ» UK» AQ jergilikti aýmaqtyq organdarmen birlesip sý qoımalaryn, aýyl sharýashylyǵy tospalarynyń jaǵdaıyn komıssııalyq tekserýden ótkizýde.
Qazirgi kezde Shyǵys Qazaqstan oblysynyń temirjolshylary qyzyl sý ótetin tustardy apatty jaǵdaılardan saqtaý úshin barlyq tıisti sharalardy qabyldaýda. 175 shaqyrymdaǵy Turǵysyn-Zyrıan qýma joly men Tıshınskaıa- Rıdder baǵdarynyń 325 shaqyrymyndaǵy Gromotýha ózeniniń arnasy arshylýda.
Sonymen qatar temirjol boıynan qasat qar arshylýda. Qar tazalaý maýsymy bastalǵaly beri magıstraldyq jol boıynan 250 myń tekshe metr qar syrtqa shyǵaryldy. Temirjol boıyn qar jaldarynan arshý maqsatynda qar arshý jáne tazalaý tehnıkalary jumyldyrylǵan.
«Kompanııanyń barlyq óńirlik bólimshelerinde temirjol kópirleri qysqy qaldyqtardan, muzdan tazalanyp, sý júıeleri men aryqtar, sý kózderi túgeldeı arshylýda. Temirjol boıyndaǵy nysandardy, baǵyttaýysh burmalardy, temirjol tabandaryn tazalaý sý tasqyny qaýpin barynsha azaıtýǵa baǵyttalǵan»,-deıdi «QTJ» UK» AQ Magıstraldyq jeli dırektsııasynyń atqarýshy dırektory Baýyrjan Ýálı.
