Temirjolshylar kásipodaǵy poıyz mashınısteriniń quqyǵyn qorǵady
ASTANA. QazAqparat - Temirjolshylardyń salalyq kásipodaǵy negizsiz medıtsınalyq shekteýdi alyp tastaý arqyly poıyz mashınısiniń quqyǵyn qorǵady. Bul jaıynda «QTJ - Júk tasymaly» AQ baspasóz qyzmetinen málim boldy, dep habarlaıdy QazAqparat.
QR Densaýlyq saqtaý mınıstrliginiń №379 buıryǵyna zııandy jáne qaýipti jumystar salasynda eńbek kelisimsharttaryn jasasý úshin medıtsınalyq qarsy kórsetilim tizilimine poıyz mashınısterine qatysty ózgertýler engizildi. Ózgertýge «Qazaqstan temir joly» UK» AQ korporatıvtik ombýdsmeniniń qoldaýymen «QTJ - Júk tasymaly» AQ salalyq kásipodaǵy jáne lokomotıv brıgadasynyń jumysshylary bastamalyq jasady. Endigi ýaqytta atalǵan ózgertýlerge sáıkes qan qysymynyń joǵarylyǵy 1 sanattaǵy mashınıster emdelgennen keıin lokomotıvti basqarýǵa jiberiletin bolady.
«Bul buıryqty qaıta qaraý qajettigi baıaǵyda-aq týyndady. Jasy 35-40-qa tolǵan, sol aralyqta kásibı turǵyda mol tájirıje jınaǵan mashınıster lokomotıvti basqarý quqyǵynan aıyrylyp qaldy. Densaýlyq saqtaý mınıstrliginiń buıryǵyna sáıkes, kóptegen kásibı mashınıster jumystan bosatyldy. Endigi ýaqytta mundaı jaıttar aıtarlyqtaı azaıady», - dedi «QTJ - Júk tasymaly» AQ-nyń atqarýshy dırektory Aıtym Quraqbaev.
Dárigerlik sarapshylar komıssııasynyń tóraıymy, óndiristik dáriger Kúlán Erejepova qan qysymy bar mashınıster negizgi emdeý sharalarynan keıin jáne dárigerdiń baqylaýymen kásibı mindetin oryndaı alatyndyǵyn aıtty.
«Medıtsınanyń qazirgi deńgeıinde qan qysymynyń joǵarylyǵy 1 sanattaǵy mashınıster qozǵalys qaýipsizdigin saqtaı otyryp, kásibı mindetterin tabysty atqara alady», - dedi ol.
