Temirjolmen tasymaldanatyn Qytaı taýarynyń 51% Qazaqstan arqyly ótedi - elshi
«2020 jyldyq qańtarynan bastap koronavırýstyq shekteýlerge baılanysty Qytaı Tóraǵasy syrt memleketterge barmaǵan. Osy joly at basyn buryp, alǵashqy memleket retinde Qazaqstandy tańdap otyrǵany eki el arasyndaǵy qarym-qatynasqa erekshe mán beretinin bildiredi. Sonymen qatar, bul Qasym-Jomart Kemeluly Prezıdent bolǵaly Qytaı Tóraǵasynyń birinshi sapary. Búginde eki memleket arasynda tyǵyz qarym-qatynastar qalyptasty. Ózderińiz biletindeı, Qytaı basshysynyń maqalasy jarııalandy. Onda eki memleket arasynda máńgilik jan-jaqty strategııalyq áriptestik qarym-qatynas ornaǵany jazylǵan. Men aıtaıyn, mundaı máńgilik strategııa Qytaıdyń Qazaqstannan basqa memlekettermen qarym-qatynasynda joq», - dedi Shahrat Nuryshev.
Suhbat aıasynda elshi Qytaıǵa qatysty qoǵam arasynda týyndap jatatyn alyp-qashpa áńgimelerge túsinik berip, perspektıvaly baǵyttarǵa toqtaldy.
«Qazir Qytaı alyp memleket, onyń túrli pıǵyly bar degen qaýeset júrip jatady. Shynyn aıtý kerek, úlken alpaýyt memleketpen seriktes bolǵan Qazaqstan úshin paıdaly. Ol – kórshi. Qytaı – álemdegi ekinshi ekonomıka. Byltyr onyń jalpy ishki ónimi 18 trln dollardy qurady. Bul bizdiń eldiń ekonomıkasyn kóterýge úlken múmkinshilik jasaıdy. Sonymen qosa, Qytaı – bul úlken naryq. 1 mlrd 400 mln halqy bar. Bizdiń Qazaqstanda shyǵarylatyn túrli ónimderdi Qytaı naryǵyna shyǵaryp, ózimizdiń jergilikti óndiristi damyta alamyz. Nátıjesinde Qazaqstanǵa keletin paıda kólemi ulǵaıady. Munymen qatar, bizdiń tikeleı teńizge shyǵatyn jolymyz joq. Degenmen Qytaı arqyly Tynyq muhıtyna shyǵyp, ońtústik jáne shyǵys Azııa mememleketterimen saýda-sattyq júrgize alamyz. Sol arqyly elimizge túrli ónimder keledi. Qytaıdyń Eýropa elderimen saýda-sattyǵy jylyna 700 mlrd dollardan asady. Onyń eki paıyzy temirjol arqyly tasymaldanady. Sol temirjolmen jóneltiletin júkitiń 51 paıyzy Qazaqstan arqyly ótedi», - dep atap ótti Qazaqstannyń QHR Tótenshe jáne Ókiletti Elshisi Shahrat Nuryshev.
Eske salaıyq, Prezıdent Qasym-Jomart Toqaevtyń shaqyrýymen búgin elimizge Qytaı Halyq Respýblıkasynyń Tóraǵasy Sı Tszınpın memlekettik saparmen keledi.
