Temirjolmen eksporttalatyn astyq kólemi belgili boldy
ASTANA. QazAqparat - Astyq tasymalyna qosymsha 1 myń vagondy Reseıden tartý josparlanyp otyr. Bul týraly QR IDM Kólik komıteti tóraǵasynyń orynbasary Dmıtrıı Potlov málim etti, dep habarlaıdy QazAqparat.
«Mınıstrlik temirjol kóligimen kómir jáne astyq, sondaı-aq ózge de áleýmettik mańyzy bar júkter tasymalyna aıryqsha nazar aýdaryp otyr. Búginde ashyq vagondar parki 50 myńǵa jýyq. Jylý berý maýsymyna daıyndyq aıasynda (2017 jyldyń mamyrynan bastap) 31 mln tonnadan astam kómir tasymaldandy, bul óz kezeginde josparly kólemniń 98 paıyzy», - deıdi D. Potlov Investıtsııalar jáne damý mınıstrliginde ótken baspasóz máslıhatynda.
Onyń sózine qaraǵanda, astyq tasymalynyń sharalary qyzý júrip jatqan kezeńde jyljymaly quramnyń jetispeýi baıqalýy múmkin.
«Búginde astyqty tasymaldaýǵa shamamen 10 myń vagon jumyldyrylǵan. Olar aıyna 1 mln tonna astyq tasymaldaýdy qamtamasyz etedi», - dedi komıtet ókili.
Qazirgi kezde Aýyl sharýashylyǵy mınıstrligimen birlese astyq tasymaldaıtyn vagondar sanyn arttyrý máselesi pysyqtalýda. Osy oraıda jyl sońyna deıin astyq tasymaly kólemin arttyrý kózdelgen.
«Bul turǵyda qosymsha 1 myń vagondy Reseıden tartýdy josparlap otyrmyz. 2017 jyldyń 9 aıynda shamamen 5,5 mln tonna astyq tasymaldandy, onyń ishinde 3,6 mln tonna eksportqa shyǵaryldy. Qazan aıyna qarastyrylǵan astyq tıeý kólemi 850 myń tonnany qurap, sonyń 600 myń tonnasy eksportqa tıesili. Qarasha-jeltoqsanda tasymaldanatyn astyq 1 mln tonnaǵa deıin jetedi, onyń ishinde 650 myń tonnasy eksportqa baǵyttalady», - dedi Potlov.
