Temirjoldardan qardy tazalaý táýlik boıy júrgizilýde
ASTANA. QazAqparat - 23-30 qarasha aralyǵynda 1300 shaqyrym temirjoldyń qary kúreldi. Bul týraly QazAqparat. «Qazaqstan temir jolynyń» baspasóz qyzmetine silteme jasap habarlaıdy.
Qazaqstan temir jolynyń Aqmola, Qostanaı, Qaraǵandy, Shyǵys Qazaqstan jáne Aqtóbe oblystaryndaǵy magıstraldyq jelisine temirjoldardy qardan tazartýǵa arnalǵan tehnıkalardyń barlyq túri, sondaı-aq ınfraqurylym nysandarynyń qaryn kúreýge 9300 temirjolshy jumyldyryldy.
«Bir aptada 1300 km temirjoldyń qary kúrelip, 12 myń tekshe metrden astam qar tasyp shyǵaryldy. Joldardy tazalaý jumystary táýlik boıy júrip jatyr», - delingen habarlamada.
Kompanııa ókilderiniń aıtýynsha, óńirlik bólimshelerdiń jumysshylary poıyzdardyń toqtaýsyz júrýin qamtamasyz etýge baryn salyp otyr.
